Martínez Allegue sobre a declaración de zonas tensionadas: "O que se nos presentaron son mocións sen documentación xustificativa"

A conselleira de Vivenda e Planificación de Infraestruturas, María Martínez Allegue, afirmou que o seu departamento ten "un reto difícil, pero ilusionante" e mostrouse convencida de que a Xunta o "vai a solucionar". Así o declarou nunha entrevista na Cadena SER Galicia recollida por Europa Press, na que situou como "unha medida fundamental", para facer fronte á regulación do prezo do aluguer, aumentar o parque público de vivenda e o de vivenda protexida.

Ademais, situou como "unha liña clara" as axudas para a adquisición de vivendas e lembrou que actualmente está aberto o bono de aluguer social. Neste sentido, avanzou que esperan convocar ao longo deste mes de maio outras catro liñas de axudas en materia de rehabilitación e vinculadas aos fondos MRR. Por iso, a conselleira pediu, en reunión que mantivo o mércores, á ministra de Vivenda e Axenda Urbana, Isabel Rodríguez, que aumenten os fondos destinados a Galicia para facer fronte á demanda, xa que asegurou que a comunidade necesita catro veces máis dos fondos que recibe.

ZONAS TENSIONADAS

Cuestionada sobre as zonas de aluguer tensionado, a conselleira indicou que se deu unha imaxe deste tipo de zonas que "non é real", algo que asegurou que "recoñeceu a ministra". "Tendo en conta que só os grandes tenedores poderían aplicar ese límite de prezos e en Galicia eses propietarios sitúanse no 4 %", detallou a titular de Vivenda. Por iso, a ministra, segundo Allegue, recoñeceu que a declaración destas zonas "non é tanto" limitar o prezo do aluguer, senón "fomentar un plan" de solucións que terá que articular a corporación municipal correspondente.

Neste contexto, mantivo que a Xunta non iniciará de oficio ese procedemento e que teñen que ser os concellos os que o soliciten. "O que se nos ten presentado son mocións acordadas en pleno que carecen de documentación xustificativa. Non é que non queiramos declaralas é que non achegan documentación algunha para dita declaración", puntualizou.

CARTA A ÓSCAR PUENTE

Por outra banda, tanto a conselleira de Vivenda como o conselleiro de Presidencia, Xustiza e Deportes, Diego Calvo, enviaron unha carta ao ministro de Transportes, Óscar Puente, na que urxiron a conservación das estradas nacionais que discorren pola comunidade galega. Nesta liña, reclamou ao Executivo estatal que se priorice o traspaso da titularidade da AP-9 ao goberno autonómico, entre outros temas. Finalmente, consultada sobre o aparcadoiro do CHUS, a conselleira apuntou que ao longo de "esta lexislatura" estará construído o aparcadoiro.

Vivenda en aluguer | Fonte: EUROPA PRESS - Arquivo