As estrelas do Celta e do Dépor, Iago Aspas e Lucas Pérez, xuntos na promoción de produtos galegos

O Grupo Coren vén de poñer en marcha unha campaña publicitaria para reivindicar os valores que nos unen aos galegos e a riqueza dos alimentos da nosa terra, destacando as gamas máis recoñecidas dos seus produtos, en particular o seu Xamón de Castañas. Os protagonistas do anuncio audiovisual son os futbolistas galegos Iago Aspas e Lucas Pérez.

O spot publicitario escenifica un encontro de ambos xogadores nunha partida de futbolín, demostrando que, máis aló das diferenzas que puntualmente poidan existir, antepóñense os valores que nos unen como galegos, en particular unha rica gastronomía caracterizada por produtos de calidade e que sempre tivo un papel “conciliador” á hora de liquidar calquera posible discrepancia.

Coren agradeceu a colaboración de ambos os futbolistas que, "malia a rivalidade que poda existir no ámbito deportivo, comparten por enriba de todo unha gran amizade no persoal, en liña co espírito que transmite a campaña". O obxectivo de xuntalos na campaña audiovisual é, en palabras da cooperativa ourensán, "poñer en valor os produtos alimentarios da nosa terra, froito do esforzo dos produtores galegos que traballan cumprindo os máis esixentes parámetros de produción, benestar animal e respecto ao medio ambiente".

A campaña desenvolverase durante a primeira quincena do mes de xuño nos principais medios de comunicación de Galicia, con presenza na televisión de Galicia, emisoras de radio, prensa escrita e dixital, plataformas de televisión e vídeo en liña, redes sociais e pantallas en centros comerciais.