Condenado un empresario de Carballo por non dar de alta na Seguridade Social a dez empregados
O TSXG confirmou a sentenza da sección segunda da Audiencia Provincial da Coruña.
Por Europa Press / Redacción | A CORUÑA | 18/06/2024 | Actualizada ás 14:33
A Sala do Civil e Penal do Tribunal Superior de Xustiza de Galicia (TSXG) confirmou a sentenza da sección segunda da Audiencia Provincial da Coruña que condenou a un ano e catro meses de cárcere a un empresario de Carballo.
Fíxoo ao considerar probado que cometeu, en relación a uns feitos ocorridos en 2018, un delito contra os dereitos dos traballadores ao contratar a dez persoas sen dalas de alta na Seguridade Social
O alto tribunal, informan desde o TSXG, desestimou o recurso de apelación presentado pola defensa do condenado, no que discutía, entre outras cuestións, tanto a tipicidade como a autoría do delito. Os maxistrados do TSXG consideran que existe proba suficiente, a cal foi obtida "con respecto ás garantías do dereito de defensa" e valorada "de forma racional" pola Audiencia Provincial.
Ademais, engaden que o acusado "dirixía a actividade hostaleira, co persoal contratado de forma extraoficial". Por iso, entenden que a súa autoría "resulta evidente", polo que rexeitan exoneralo por non figurar como administrador da empresa, tal e como demandaba o seu defensa.
