Un profesor dunha academia de Pontevedra é condenado a pagar 15.000 euros a unha alumna á que agrediu sexualmente

A Sala do Civil e Penal do Tribunal Superior de Xustiza de Galicia (TSXG) condenou ao profesor dunha academia de Pontevedra a indemnizar a unha das súas alumnas con 15.000 euros por agredila sexualmente de forma continuada. Segundo informou o alto tribunal, a Sala acordou engadir á pena de dous anos de cárcere imposta pola Audiencia Provincial de Pontevedra esa indemnización a favor da vítima, motivada pola "repulsa social do delito castigado e a transcendencia do ilícito na vida da prexudicada".

O alto tribunal galego confirmou a sentenza da sección cuarta da Audiencia Provincial de Pontevedra que condenou ao acusado a dous anos de cárcere por cometer un delito continuado de agresión sexual sobre unha das súas alumnas, menor de idade. O procesado, segundo a resolución, enviaba mensaxes de 'WhatsApp' de contido sexual á vítima, facíalle agasallos e convidábaa a cear.

DESESTIMA O RECURSO DE APELACIÓN DO ACUSADO

O tribunal, por tanto, desestimou o recurso de apelación interposto pola defensa do acusado, pois entende que o testemuño da vítima é compatible co conxunto das probas, así como que a conduta do recorrente, "non encaixa na relación profesor-alumna". A Sala tamén apoia a súa resolución na carga probatoria das declaracións da contorna máis próxima á vítima e no recolleito nos informes periciais, que "remarcan a pegada psíquica, as secuelas de tensión postraumática e a impresión de alta credibilidade" do testemuño da menor.

Sede do TSXG | Fonte: Xunta - Arquivo