Fin de semana de oposicións en Galicia: Case 22.00 persoas buscan ser profesores ou médicos de familia
Os exames de Educación celebraranse desde sábado en 15 localidades, mentres que as do Sergas serán no recinto feiral de Silleda.
Por Europa Press / Redacción | SANTIAGO DE COMPOSTELA | 22/06/2024 | Actualizada ás 12:40
Miles de persoas participarán ao longo deste fin de semana en senllos procesos de oposicións que convoca a Xunta e que se prevén multitudinarias, entre as da Consellería de Educación, cun total de 21.230 persoas que aspirarán a unha praza de profesor; e as do Servizo Galego de Saúde (Sergas), nas que outras 606 buscarán unha vacante como médico de Atención Primaria.
Por unha banda, os exames de Educación repartiranse entre 15 localidades galegas a partir deste sábado. A Xunta convoca un total de 1.743 postos --dá a un por cada 12 aspirantes, aproximadamente--, dos cales o 86% son de novo ingreso, mentres que os restantes son de promoción interna.
Das 1.743 prazas que convoca a Consellería de Educación, a maioría (875) son do Corpo de Profesores de Secundaria, ás que hai apuntadas 11.189 persoas. O segundo grupo máis numeroso é o Corpo de Mestres, con 520 vacantes e 9.011 inscritos. A maiores, hai 84 prazas do Corpo de Especialistas en Sectores Singulares da FP con 528 inscritos, máis outras 33 no de Escolas Oficiais de Idiomas (EOI) con 308 persoas anotadas. Ademais, convócanse 220 prazas de acceso do subgrupo A2 ao A1, neste caso con só 99 inscritos.
O SERGAS OFERTA 271 PRAZAS DE MÉDICO
Por outra banda, este domingo haberá exames do concurso-oposición a 271 prazas de médico de familia de Atención Primaria: 126 de acceso libre, 132 de promoción interna e outras 13 de discapacidade xeral.
Os 606 aspirantes que hai anotados terán que desprazarse, no seu caso, ata o Recinto Feiral Internacional de Galicia en Silleda (Pontevedra), onde as probas arrincarán ás 9.30 horas da mañá.
