Pontón reclama para Galicia un modelo de financiamento como o vasco: "Sen autonomía fiscal, a política é papel mollado"

A portavoz nacional do BNG, Ana Pontón, reclamou para Galicia un sistema de financiamento similar ao que teñen País Vasco ou Navarra para dotar á Comunidade galega de capacidade de recadación e xestión de impostos, un modelo que, defendeu, ten "encaixe" na Constitución. "Sen autonomía fiscal, a autonomía política non deixa de ser papel mollado", proclamou Pontón acompañada de parte do seu grupo parlamentario e membros da dirección nacional do Bloque ante a tumba de Castelao no Panteón de Galegos Ilustres de San Domingos de Bonaval, en Santiago.

Alí, este xoves 27 de xuño, véspera do 88º aniversario da aprobación en referendo do Estatuto de Autonomía de 1936, a líder nacionalista leu unha declaración sobre a postura da segunda forza na Cámara galega no debate da reforma do modelo de financiamento autonómico, no que considera que está xogo "o status político" de Galicia. "Galicia non pode ser espectadora, ten que ser protagonista. Non imos permitir que nos baixen do tren das nacións para situarnos nun rexionalismo de terceira", aseverou Pontón, quen incidiu na importancia de reclamar un modelo de financiamento "singular", "adaptado" á realidade galega e que confira á comunidade "as chaves" do seu diñeiro a través do desenvolvemento dunha Facenda propia que permita xestionar "o 100 %" dos seus recursos económicos.

Isto permitiría gozar de "capacidade de decisión" desde o autogoberno para escoller as "prioridades como país" e aplicar unha política distributiva de "que achegue máis quen máis ten". A reclamación do Bloque parte, segundo explicou o seu portavoz nacional, do status de nacionalidade histórica que lle confire a Constitución Española e que así debe ser defendido pola Xunta no debate aberto a nivel estatal sobre a reforma dun sistema asinado en 2009 e que leva máis dunha década caducado.

Un modelo que, como remarcou Pontón, "discrimina" a Galicia e provocou "un buraco de 14.000 millóns de euros" a razón de "1.000 millóns ao ano perdidos" polos galegos, unha "factura" que adxudica "ao centralismo" e que "ten a firma" do Partido Popular. Por iso, censurou os "discursos falsos" que atribúe ás "forzas centralistas" (PP e PSOE) de que Galicia é un territorio "pobre" e "dependente" porque "debilita" a posición á hora de negociar co Estado, que, segundo Pontón, é quen "fai caixa" co que se recada na comunidade.

"EVITAR A MARXINACIÓN"

Nun contexto de "grandes cambios" e "desafíos", o BNG ve necesario "empoderar" Galicia para evitar a "marxinación" á que, di, quérena levar "as forzas estatais", polo que avoga por "avanzar" na capacidade de decisión política dun autogoberno que ve "unha falacia" se non vai acompañado de "autonomía" tamén no campo das finanzas.

Ás portas dunha efeméride como o aniversario do Estatuto do 36, Pontón apelou ao exemplo dos "irredutibles" homes e mulleres que impulsaron a carta de autogoberno para Galicia truncada menos dun mes máis tarde polo levantamento militar do 18 de xullo; ou a "efémera" proclamación da "República Galega" en 1931 como resposta á paralización das obras do ferrocarril.

Esa "estirpe" de homes e mulleres que "se mobilizaron" contra os "agravios" que o centralismo "impuña" a Galicia son a "inspiración" do BNG para defender o desenvolvemento de ferramentas que doten á comunidade de "soberanía e capacidade para decidir o seu futuro". "Desde nós para nós", apostilou.

"O CAFÉ PARA TODOS NOS TROUXO AQUÍ"

Na semana na que o PP deixou clara a súa postura no Parlamento galego de que rexeita reclamar ante o Goberno unha negociación bilateral do modelo de financiamento porque a Xunta aposta porque se aborde co conxunto das comunidades, Pontón censurou esta "multilateralidade", na que ve unha das causas polas que Galicia está "discriminada" no modelo actual.

"O café para todos da multitaleralidade é o que nos trouxo aquí, a este modelo discriminatorio que é necesario superar", incidiu a líder frontista, que instou ao presidente autonómico, Alfonso Rueda, a que abandone o seu papel de "apóstolo do centralismo" e o seu "discurso cohibido e falaz de que Galicia é pobre e dependente" para defender ante o Goberno un modelo "xusto".

Ana Pontón realiza unha ofrenda floral ante a tumba de Castelao no Panteón de Galegos Ilustres | Fonte: BNG

O PPDEG RETA AO BNG A PRONUNCIARSE SOBRE O FINANCIAMENTO DE CATALUÑA

Pola súa banda, o PPdeG retou este xoves ao BNG a pronunciarse sobre a proposta de financiamento singular para Cataluña, en lugar de "sacarse coellos da chisteira", como o modelo de cota galega ou Facenda propia de Galicia, e insistiu en que o financiamento autonómico debe basearse nun "acordo multilateral". Así o manifestou a secretaria xeral do PPdeG, Paula Prado, a preguntas dos medios nunha rolda de prensa, e insistiu en que os 'populares' defenden, en primeiro lugar, que o Goberno convoque o Consello de Política Fiscal e Financeira e, en segundo, que se busque "un acordo multilateral e non un acordo bilateral do Goberno con Cataluña".

Nese sentido, incidiu en que "os expertos" advirten de que "darlle máis diñeiro a Cataluña supón romper a igualdade e pór en risco o financiamento dos servizos públicos". "E por aí non imos pasar", remarcou. Con respecto á proposta do BNG, que reclama un modelo como o vasco, Paula Prado retou aos nacionalistas a pronunciarse sobre ese financiamento singular para Cataluña, en lugar de "sacarse coellos da chisteira". "Que digan se lles parece ben a proposta do Goberno de España de darlle máis a Cataluña, se eles como nacionalistas galegos queren profundar niso", proclamou.

Finalmente, lembrou que o PSOE enviou a Besteiro "a negociar que lle desen máis diñeiro a Cataluña" e o PPdeG non pode aceptar "todo este festival para facer, non se sabe se presidente a Illa, a Puigdemont ou para garantir a presidencia de Sánchez". "Estamos un pouco perdidos neste quebracabezas que tenta facer A Moncloa, para o cal lle están faltando pezas", ironizou.