'IRIBARNE' gaña o Premio do Público da MIT 2024
A obra de ButacaZero, en coprodución coa MIT e o CDN, consolida a Esther Carrodeguas como unha das dramaturgas máis destacadas do teatro galego contemporáneo. Por outra banda, o 19º Premio Abrente de textos teatrais foi para Alberto Ramos coa súa obra 'Os servizos prestados'.
Por Galicia Confidencial | Ribadavia | 01/08/2024 | Actualizada ás 10:45
O Xurado do Premio Abrente de 2024, composto por Nerea Brey, actriz e dramaturga premiada en 2023, Rubén Porto actor e Marcos Alonso, membro da Sala Ártika e Roberto Pascual, Director Artístico da Mostra Internacionald de Teatro de Ribadavia, decidiron conceder por unanimidade o Premio Abrente desta 40ª edición da MIT ao texto titulado "Os servizos prestados", unha obra de Alberto Ramos Ríos.
"A obra destacou polo seu interese social, con posibilidade de xerar debate arredor da explotación e da autoexplotación laboral e o risco que conleva de perda de dereitos da clase traballadora conquistados historicamente. Tamén transcende o texto ao ámbito afectivo, á perda de vínculos de amizade por motivos de relacións laborais", comentan dende a organización da MIT.
Tamén destacan na obra os cambios de personaxes, o ritmo, a ruptura da cuarta parede e o pertinente uso de metáforas. Recursos compositivos que lle conceden ao texto moito interese escénico e calidade artística.
Alberto Ramos é escritor e xornalista, estreouse como dramaturgo co Premio Rafael Dieste en 2023 e na actualidade traballa para a Asociación de Actores e Actrices de Galicia na área de Comunicación.
PREMIO DO PÚBLICO
Por outro lado, o Premio do Público recaeu por escasas décimas no espectáculo Iribarne, unha sátira política de excelente dramaturxia e interpretación e que se converteu nun dos espectáculos galegos máis valorados na historia deste festival internacional e que consolida a Esther Carrodeguas como unha das dramaturgas máis destacadas do teatro galego contemporáneo.
As votacións dos espectáculos desta edición estiveron moi equilibradas e a satisfacción do público quedou de manisfesto consolidando a este como protagonista indiscutible. "Un público experimentado e aberto á innovación á que se acostumou cunha Mostra esixente, aberta e moi internacional nestes últimos anos baixo a dirección de Roberto Pascual", comentan finalmente dende a organización.
