Crítica á xestión das residencias en Galicia: o PSOE denuncia o deixamento da Xunta e a falta de prazas públicas
A deputada do PSOE destaca a escaseza de prazas en residencias públicas e acusa á Consellería de Política Social de protexer intereses privados.
Por Europa Press / Redacción | Santiago de Compostela | 28/08/2024 | Actualizada ás 14:38
A deputada socialista no Parlamento galego Paloma Castro acusou á Xunta de "priorizar" as residencias de maiores privadas "mentres Galicia é a cuarta comunidade autónoma con menos prazas do Estado". Denunciou, tamén, que continúe "sen presentar o seu modelo de atención aos maiores". Nun comunicado, explica que presentou unha serie de iniciativas parlamentarias para reclamar ao Executivo autonómico a construción dunha residencia pública en Cambados, "a primeira do Salnés".
Advirte, ademais, que o "deixamento" da Xunta ao "renunciar" a construír unha residencia en cada unha das grandes cidades galegas débese a que a Consellería de Política Social "está máis preocupada por protexer o negocio dunha empresa privada que de prestar un servizo público de calidade á cidadanía galega".
Ao mesmo tempo, lembra que o Goberno galego "continúa a día de hoxe sen presentar un modelo de residencias públicas" e engade que "lamentablemente está encantada con que Galicia siga sendo a cuarta comunidade autónoma con menos prazas de residencias para maiores". Neste sentido, apunta que "700.000 galegos e galegas, un de cada catro cidadáns, teñen máis de 65 anos, pero só hai prazas para o 2,84%, e só o 14% das 22.000 prazas son públicas".
