Por Europa Press / Redacción | SANTIAGO DE COMPOSTELA | 21/09/2024 | Actualizada ás 21:02
O municipio ourensán de Cenlle acolleu este sábado o Encontro de Familias Acolledoras de Cruz Vermella en Galicia no que máis de 200 persoas entre adultos, nenos/as e adolescentes compartiron unha xornada lúdico-formativa, na que puideron intercambiar experiencias e profundar en diferentes aspectos da educación e crianza dos menores.
No acto de benvida ás familias interviñeron Jacobo Rey, director xeral de Familia, Infancia e Dinamización Demográfica da Xunta, Mercedes Casanova, presidenta de Cruz Vermella en Galicia; Rebeca Sotelo, alcaldesa de Cenlle; e Felipe Ferreiro, presidente de Cruz Vermella en Ourense.
Conducida pola xornalista Eva Conde-Corbal, a sesión didáctica dedicou un primeiro tempo á atención temperá de nenos e nenas de 0 a 6 anos, da man de Rocío García Castro, vicepresidenta da Asociación Galega de Atención Temperá.
Nunha segunda parte, a sesión centrouse na adolescencia, coa participación de Ricardo Fandiño Pascual, coordinador da Asociación para a Saúde Emocional na Infancia e na Adolescencia.
Cruz Vermella detallou nunha nota de prensa que Familias Acolledoras é un programa da Xunta xestionado pola entidade a través do cal entre xaneiro e agosto deste ano foron acollidos 295 menores na comunidade. Nestes momentos hai 239 menores que están a ser acollidos, mentres que 56 están á espera.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.