O ministro Torres rexeita desigualdades entre autonomías:"Con Sánchez todas recibiron máis"
Por Europa Press / Redacción | MADRID | 27/09/2024 | Actualizada ás 16:53
O ministro de Política Territorial, Ángel Víctor Torres, rexeitou as críticas emitidas desde o PP tras o acordo alcanzado con ERC para un financiamento singular de Cataluña, que sinalan que se unhas comunidades autónomas reciben máis fondos, outras estarán abocadas a recibir menos e defendeu que co actual presidente do Goberno, Pedro Sánchez "todas recibiron máis financiamento" que coa anterior administración de Mariano Rajoy.
Deste xeito, Torres respondeu ás críticas lanzadas este mesmo venres pola presidenta de Cantabria, María José Saénz de Buruaga, tras reunirse na Moncloa con Sánchez, dentro da rolda de reunións bilaterais que comezou a semana pasada. Do mesmo xeito que fixeron o venres pasado os presidentes da Xunta de Galicia e da Xunta de Andalucía, Alfonso Rueda e Juanma Moreno, Buruaga reclamou a Sánchez que retire a "cota separatista" con Cataluña, que ao seu xuízo vai xerar unha ruptura do principio de igualdade entre españois.
Pola contra, o ministro Torres, replicou sinalando que desde que Sánchez está na Moncloa todas as comunidades obtiveron entre o 30 e o 40% máis de fondos que durante o Goberno de Rajoy.
Ademais, reiterou que hai comunidades que retiran impostos ás rendas altas e deixan de ingresar "moitísimos millóns de euros" que tamén forman parte do sistema de financiamento autonómico, segundo remarcou.
