Comeza a caza sen límite de xabarís en 260 municipios galegos
A Xunta combina esta medida coas normativas de caza regulada para frear a sobrepoboación desta especie.
Por Europa Press / Redacción | Santiago de Compostela | 12/10/2024 | Actualizada ás 10:34
A caza sen límite de xabarís entra en vigor este sábado, 12 de outubro, en 40 comarcas, que abarcan a un total de 260 municipios --case o 85% do territorio galego--. Esta medida da Xunta de emerxencia cinexética durará ata o 23 de febreiro de 2025.
O Goberno galego xustifica esta medida excepcional no aumento de presenza deste animal e os danos que carrexa, tanto no campo como en accidentes de tráfico. De feito, a conselleira de Medio Ambiente, Ángeles Vázquez, falaba esta semana de "unha auténtica praga" que non se logrou conter a pesar de ser abatidos 40.000 exemplares nos dous últimos anos.
En total, a declaración abarca 40 comarcas (13 na Coruña, 10 en Lugo, 11 en Ourense e 6 en Pontevedra) que comprenden 260 concellos (77 deles coruñeses, 57 lucenses, 87 ourensáns e 39 pontevedreses) e un 84,7% da superficie total de Galicia.
CUARTA VEZ
Esta é a cuarta vez (tras 2019, 2021 e 2023) que se recorre a este instrumento, provisional e extraordinario, co fin de axilizar a aplicación de medidas dirixidas ao control das poboacións desta especie naquelas zonas con maior incidencia.
Este un instrumento adicional e complementario á caza regulada dentro dos terreos de réxime cinexético especial e común, así como tamén ás actuacións de control por danos, que seguirán desenvolvéndose nos termos fixados na resolución anual pola que se regula a caza en Galicia.
En concreto, durante a vixencia da declaración nestas comarcas permitirase abater ou capturar, sen límite de exemplares, xabarís de ambos os sexos, prioritariamente femias adultas e subadultas de calquera idade.
Así mesmo, nas zonas en situación de emerxencia cinexética temporal será posible abater crías e femias sucesivas de crías a condición de que haxa unha autorización especial previa por parte da Dirección Xeral de Patrimonio Natural.
