A Xunta poderá dar de baixa aos interinos que non superen un periodo de proba

A lei de acompañamento aos orzamentos da Xunta para 2025 recolle unha modificación da lei do emprego público segundo a cal o primeiro nomeamento como persoal funcionario interino nun determinado corpo, escala ou especialidade estará suxeito a un período de proba.

Este período terá unha duración de tres meses para os corpos, escalas ou especialidades do grupo A; dous meses para o grupo B e un mes para os corpos, escalas ou especialidades do grupo C e da agrupación profesional de persoal funcionario, segundo establece o texto legal, que recolle Europa Press.

"A non superación do período de proba implicará o cesamento da persoa nomeada como persoal funcionario interino e a baixa na lista correspondente ao grupo, corpo e/ou escala ou especialidade en que se realizou o chamamento durante un período de seis meses", indica a medida, que adiantou o diario 'Faro de Vigo'.

Engade este artigo que o regulado con respecto ao período de proba "non será aplicable para as persoas nomeadas funcionarias interinas que acrediten discapacidade intelectual".

Protesta do profesorado interino | Fonte: profesorprecario.wordpress.com