Condenan a oito anos de cárcere a un pai por tocamentos a súa filla de 16 anos
Por Europa Press / Redacción | SANTIAGO DE COMPOSTELA | 29/10/2024 | Actualizada ás 12:37
A sección sexta da Audiencia Provincial da Coruña, con sede en Santiago de Compostela, condenou a oito anos de cárcere a un pai por cometer, sobre a súa filla de 16 anos, un delito contra a liberdade sexual.
Ademais da pena de prisión, o tribunal inhabilitouno para calquera oficio ou profesión que leve contacto regular e directo con menores de idade durante 12 anos e impúxolle a prohibición de comunicarse por calquera medio e de aproximarse a menos de 200 metros do lugar onde se ache a vítima por un tempo de 15 anos, así como a medida de liberdade vixiada durante seis anos. En concepto de responsabilidade civil, deberá indemnizar á súa filla con 35.000 euros.
Na sentenza, e tal e como recolle o Tribunal Superior de Xustiza de Galicia (TSXG) nun comunicado, a Sala considera probado que o procesado, cando a menor tiña 16 anos e levaba só uns días residindo no seu domicilio --anteriormente vivía coa súa nai, da cal o acusado estaba separado--, díxolle que se tomase a medicación que tiña pautada.
Tras quedar durmida, segundo consta na resolución, o seu pai, "para satisfacer os seus instintos libidinosos, comezou a tocala por baixo do pixama, metendo a súa man baixo as bragas da menor e tocándoa pola zona exterior dos seus órganos xenitais, chegando a introducirlle dous dedos na vaxina".
A pesar de que a menor se espertou e, "paralizada pola sorpresa", pedíalle que parase, o condenado non o fixo, segundo indican os xuíces no fallo, no que explican que, finalmente, a vítima conseguiu saír da cama e da habitación, refuxiándose no cuarto de baño.
O procesado, pola súa banda, abandonou o domicilio para dirixirse ao seu posto de traballo. Como consecuencia destes feitos, a menor presentou síntomas compatibles cun trastorno por tensión postraumática.
A declaración da afectada, segundo a Sala, "cumpre todas as esixencias jurisprudenciales e resultou totalmente crible", pois afirma que é "persistente, firme, detallada, crible, conta cunha sólida corroboración obxectiva de datos periféricos e está avalada polas declaracións das psicólogas, que apreciaron patoloxías psicolóxicas coherentes e compatibles co narrado".
