Tirón de orellas de Rueda á patronal eólica: "Non só ten que pensar na súa conta de resultados"
"A patronal eléctrica acabará dándose conta de que, á parte de pensar na súa conta de resultados, ten que pensar nos territorios", afirma.
Por Europa Press / Redacción | SANTIAGO DE COMPOSTELA | 16/12/2024 | Actualizada ás 20:35
O presidente da Xunta, Alfonso Rueda, defendeu este luns as medidas adoptadas polo seu Executivo en relación ao sector eólico ante as últimas críticas vertidas pola patronal contra as mesmas. Desta augurou que "acabará dándose conta de que, á parte de pensar na súa conta de resultados, ten que pensar nos territorios" onde implanta os seus proxectos enerxéticos.
Manifestouno despois de que a patronal eólica de España e empresas do sector das renovables volvesen a criticar, mediante un comunicado, os cambios normativos que inclúe a Xunta na lei de acompañamento aos seus orzamentos, que aprobará de forma definitiva esta semana o Parlamento galego, xa que suporán "retardar" proxectos e cuestións como a repotenciación.
Respecto diso, Rueda remarcou que a Xunta seguirá "tentando explicar a todo o mundo, incluída tamén a patronal enerxética", que a intención do seu Goberno é que "os recursos que se xeran en Galicia produzan un impacto directo principalmente en Galicia", e as empresas e veciños das zonas afectadas teñan un prezo da luz máis barato.
Tamén defendeu a repotenciación, dadas as posibilidades técnicas actuais de reducir o número de muíños e, en consecuencia, o seu impacto paisaxístico. Como exemplo, indicou que "onde hai dez ou doce pódense converter en dous ou tres". "Iso é o que queremos", esgrimiu, antes de reivindicar que "todo o mundo ten que entender" a defensa de "políticas ambientais e de impacto positivo" para quen viven en Galicia.
ACTUAR CON "FIRMEZA"
"Estou seguro de que a patronal eléctrica acabará dándose conta de que, á parte de pensar na súa conta de resultados, ten que pensar nos territorios onde se implantan as súas medidas", manifestou, antes de incidir en que celebra que a intención manifestada polo seu homólogo estatal, Pedro Sánchez, sexa a de "ir por aquí tamén".
"Será que tampouco é tan mala idea, polo menos en algo está a acertar", esgrimiu, antes de concluír que a súa intención é que o seu Executivo actúe con "firmeza" cando considere que ten "a razón". Neste caso, esgrimiu que entende que é así dado que os novos pasos danse "en beneficio dos cidadáns".
