Coren reforza o seu persoal con 200 traballadores para cubrir a demanda de Nadal
A campaña de Nadal da cooperativa ourensá desenvólvese baixo o slogan “O Nadal con máis estrelas”, en referencia a unha gama de produtos típicos destas datas integrada por máis de 20 propostas e recomendada polo prestixioso chef vasco Martín Berasategui.
Por Galicia Confidencial | Ourense | 22/12/2024 | Actualizada ás 10:00
O Grupo Coren atópase inmerso na campaña de Nadal e, co fin de atender a demanda de especialidades culinarias destas festas, a cooperativa reforzou o seu persoal con 200 postos de traballo.
Coren é un referente en producións cárnicas para estas festas e a campaña representa tradicionalmente un dos períodos de maior actividade do ano. De feito, conta cunha planta de 60.000 metros cadrados destinada especificamente ás producións da súa gama do Nadal, situada no Centro de Procesado Avícola de Santa Cruz de Arrabaldo.
Con todo, o incremento de contratacións afecta a todas as plantas do Grupo, co obxectivo de cubrir o aumento de actividade en toda a cadea de produción, desde a orixe en granxa ata a chegada ao consumidor. Ademais, a maior duración das campañas motiva tamén a maior duración dos contratos, que se estenden desde outubro a xaneiro.
"O NADAL CON MÁIS ESTRELAS"
O slogan “O Nadal con máis estrelas” nace para referenciar unha gama de produtos do Nadal integrada por máis de 20 propostas e recomendada por Martín Berasategui --o chef con máis estrelas Michelín--, que colabora por segundo ano consecutivo coa cooperativa galega.
As principais “estrelas” da gama do Nadal de Coren son a Pularda do Convento e o capón galego, que contarán con edicións limitadas e numeradas de 11.000 unidades cada un, que se producen exclusivamente para Nadal. A Pularda do Convento críase entre os muros do Convento de Santa Clara de Allariz en Galicia con todo o agarimo das monxas clarisas, de forma tradicional e cunha alimentación totalmente natural, que dá lugar a unha carne zumarenta e exquisita. Pola súa banda, o capón é de raza campeira, criado de xeito tradicional con saída a espazos arborizados, o que facilita a infiltración de graxa e resulta nunha carne fina e saborosa.
Entre os clásicos, salientar o Pito de Corral, igualmente criado co máximo benestar saíndo aos campos galegos e alimentándose a base de cereais; e a gama de recheos elaborados de modo artesanal pola cooperativa e sen emprego de ovo, glute, lactosa, froitos secos nin colorantes.
