Ventos de máis de 120 km/h nunha xornada de alerta laranxa

O municipio de Cedeira rexistrou ventos de 123,9 quilómetros por hora ás 11,00 horas deste martes nunha xornada de alerta laranxa. Viveiro tamén superou os 120 quilómetros por hora. Galicia está afectada este martes por unha borrasca que obrigou a activar alerta laranxa por fortes ventos nas provincias de Lugo, A Coruña e Pontevedra, así como por ondas de ata sete metros. Todo iso á espera dun mércores, 8 de xaneiro, no que haberá unha nova xornada de alerta laranxa por vento e ondada no tres provincias marítimas. Meteogalicia avisa de que haberá choiva "intensa" na mañá deste mércores.

En concreto, a alerta laranxa será por ondas e vento no mar da Coruña e Pontevedra, así como refachos de máis de 100 quilómetros por hora na Mariña. Hai diferentes avisos amarelos por choivas de máis de 15 litros por metro cadrado nunha hora nas provincias da Coruña e Pontevedra, así como no noroeste de Ourense. A semana estará marcada pola inestabilidade no noroeste peninsular, con choivas en puntos de Galicia e o Cantábrico, segundo a predición do portavoz de AEMET, Luís Bañón. Aínda así, as temperaturas subirán en case toda España ata o venres.

PECHE DE PARQUES E SUSPENSIÓN DE ACTIVIDADES DEPORTIVAS

O temporal que azouta Galicia este martes e mércores obriga a varios municipios a pechar parques por seguridade dos viandantes, dúas xornadas con diferentes avisos laranxa e amarelo por fortes ventos e choivas. No caso da Coruña, o Concello informou, a través de redes sociais, de que se amplían as medidas polas alertas meteorolóxicas activas En concreto, co peche de parques e xardíns ata o vindeiro xoves, día 9, sen posibilidade tampouco de acceso ás praias ata esa xornada polo menos. Tamén precisa de que no caso de que se prolonguen informarase "o seu momento". Así mesmo, o goberno local insta á cidadanía a ter precaución e a seguir as indicacións dos equipos de seguridade e emerxencias.

Pola súa banda, o Concello de Santiago indicou que, debido a ventos superiores a 70 quilómetros por hora, procédese ao peche de varios parques a partir das 18.00 horas deste martes e durante o mércores. Mentres, o Concello de Lugo informa de que a última hora desta tarde está previsto que a área de Transición Ecolóxica proceda ao peche de parques na cidade por un fenómeno meteorolóxico adverso que deixará ventos de máis de 70 quilómetros por hora. De tal forma, procederase a precintar os parques de Rosalía de Castro, Frigsa, Paxariños e Marcos Cela. Ademais, a Secretaría Xeral para o Deporte anuncia que suspende a actividade deportiva federada no mar nos municipios das provincias da Coruña e Pontevedra durante este mércores, coa previsión de ondas de ata seis metros.

PREVISIÓN DA AEMET PARA ESTE MÉRCORES

A AEMET avanzou que este mércores chegará unha fronte fría atlántica ao oeste da Península e deixará ceos nubrados ou cubertos con precipitacións na maior parte do territorio. Estas prevense máis abundantes no cuadrante noroeste e poderán chegar a persistentes no oeste do Sistema Central, especialmente no oeste de Galicia, onde hai posibilidades de que sexan fortes e vaian acompañadas de treboadas.

Pola contra, é pouco probable que acaben alcanzando á fachada oriental peninsular e a Baleares, onde predominarán os intervalos de nubes altas. No Pirineo, o prognóstico marca que caerán en forma de neve, aínda que engade que a neve tamén será posible noutras montañas da metade norte, a unha cota entre 1.600 e 2.000 metros. Mentres, haberá néboas en zonas do interior, que serán máis probables na meseta sur, especialmente nas terras altas de Guadalaxara. En Canarias, haberá tempo estable con predominio de ceos pouco nubrados ou despexados.

No que respecta ás temperaturas, o organismo estatal indicou que os valores aumentarán na maior parte da Península e Baleares. As máximas subirán de forma máis acusada no leste peninsular e as mínimas farano no norte e noroeste, onde poderán chegar a rexistrar ascensos notables. En Canarias, as máximas rexistrarán poucos cambios e as mínimas irán en lixeiro descenso. Ademais, as xeadas limitaranse a Pireneos, aínda que son posibles noutros puntos de montaña ou de ambas as mesetas. Este día, a capital de provincia coa previsión de mínima máis baixa será Teruel, con 1 ºC; seguida de Cidade Real e Córdoba, con 2 ºC.