Case o 16 % dos autónomos dados de alta en Galicia no 2024 proceden de actividades de alta cualificación
Na última década, estes sectores experimentaron un crecemento do 29,3 %, ata os 31.900 traballadores autónomos, dado que, en 2015, contaban con 24.715 afiliados.
Por Europa Press / Redacción | SANTIAGO DE COMPOSTELA | 08/01/2025 | Actualizada ás 14:54
Case o 16 % dos afiliados ao Réxime Especial de Traballadores Autónomos (RETA) en Galicia pertencen a sectores de alta cualificación como a educación, sanidade e actividades profesionais, científicas e técnicas, o que representa a máis de 31.900 traballadores por conta propia, segundo os datos da Asociación Galega de Traballadores Autónomos e do Mar (Agtamar), integrada na Unión Profesional de Traballadores Autónomos.
Nun comunicado, a entidade destacou que na última década, estes sectores experimentaron un crecemento do 29,3 %, dado que, en 2015, contaban con 24.715 afiliados. A nivel estatal o 17,3 % dos afiliados en 2024 pertencen a estes sectores de alta cualificación, cunha subida do 33% na última década. Un incremento que a entidade considera "clave" para o crecemento sostido da afiliación ao RETA.
Pola súa banda, Agtamar destacou que ámbitos como a construción e o transporte rexistraron baixadas en 2024 en Galicia, con 77 e 70 afiliados menos, respectivamente. Ao longo dos últimos 10 anos, a construción baixou un 3,5 % e o transporte un 1,9 %. Así as cousas, sinala que o cambio de modelo no traballo autónomo é evidente e que se reflicte na progresiva saída de sectores tradicionais desde 2015. O comercio perdeu case 9.000 autónomos en Galicia, a hostalaría reduciu a súa afiliación en máis de 3.000, a industria manufactureira en 2.538, e a agricultura en máis de 9.000 nos últimos 10 anos.
"O xiro no modelo produtivo do traballo por conta propia comezou e será necesario pór moita atención para que este cambio non se transforme na vulneración dos dereitos de miles de autónomos economicamente dependentes e, que non se xeneralice a proliferación de falsos autónomos", sinala o presidente de UPTA, Eduardo Abad, que avisa de que "globalizar o traballo autónomo sería un disparate".
"Necesitamos profesionais autónomos cualificados, dixitalizados, que sexan capaces de adaptarse ás esixencias do mercado, que melloren a súa formación e, con iso, as súas competencias", considera. Ademais, avanzou que a próxima semana a entidade iniciará unha rolda de reunións con responsables do Ministerio de Traballo para que, de forma inmediata, se poña en marcha a mesa de traballo da Estratexia Nacional de Impulso do Traballo Autónomo.
