O PPdeG fai as súas previsións para 2025: "Continuarán os agravios de Sánchez a Galicia"

O PPdeG marcouse como propósito para o novo ano que arrinca "seguir traballando por cumprir a palabra dada, facendo realidade os compromisos adquiridos e blindando a Galicia que funciona" co presidente Alfonso Rueda á fronte e que contrapón cun Goberno de Pedro Sánchez que "continuará os agravios" á Comunidade. Así o manifestou na mañá deste xoves a secretaria xeral do PPdeG, Paula Prado, nunha rolda de prensa na que reivindicou que "grazas á normalidade excepcional da que goza Galicia, o ano iníciase cuns orzamentos aprobados e en vigor desde o 1 de xaneiro".

"Iso é o que permite seguir ofrecendo solucións aos problemas reais dos galegos e galegas en cuestións fundamentais como a conciliación, a igualdade, a educación, a vivenda, a sanidade ou a loita contra a violencia de xénero", explicou á vez que contrapuña esta situación coa prórroga (por segundo ano consecutivo) dos Orzamentos Xerais do Estado do 2023. Paula Prado tachou de "parálise" o balance da xestión de Pedro Sánchez, ao que afeou o "cerco de corrupción" ao seu redor, a número dous dos populares galegos prognosticou un 2025 no que todo apunta que continuarán os agravios constantes do goberno central con Galicia.

"Este debería ser o ano no que, por exemplo, se puxese fin aos problemas ferroviarios ou se fixesen efectivos os traspasos de diferentes competencias. En cambio, empezamos o 2025 con máis problemas ferroviarios, cunha nova subida nas peaxes da AP-9 e a AP-53 e de novo cun bloqueo por parte do PSOE (coa complicidade do BNG) ao traspaso da principal autoestrada de Galicia", apuntou.

A secretaria xeral do PPdeG, Paula Prado, en rolda de prensa | Fonte: ÍÑIGO ROLÁN

Este "agravio" é o que levará ao PPdeG a, neste novo ano, continuar "reivindicando" a "dignidade de Galicia" fronte a un socialismo galego que, segundo indicou, "antepón sempre a Sánchez fronte aos intereses dos galegos" e fronte a "un partido independentista como o BNG, que, como xa fixo cos seus bulos sobre os pélets, segue dedicándose a asustar á xente e prexudicando aos sectores que di defender". "Se fixésemos caso ao falso alarmismo dos nacionalistas galegos, hoxe non circulariamos por unha AP-9 que anos atrás defendían como navallada a Galicia, nin contariamos con empresas tan importantes como Alcoa ou Ence", concluíu para destacar a "compatibilidade" entre "industria e respecto ao medio ambiente".

VENEZUELA

Paula Prado anunciou que esta tarde tanto ela mesma como unha "ampla representación do partido" participarán nas mobilizacións que terán lugar nas cidades galegas "en defensa da liberdade e da democracia en Venezuela": "O pobo venezolano encherá de esperanza as rúas do mesmo xeito que encheu as urnas de votos pola liberdade e contra a tiranía", indicou. "Os demócratas temos que seguir ao seu lado e facelo con convicción", remarcou para lamentar que "o PSOE galego siga sen esixir a Sánchez que dea a voz de alarma e apelando á necesidade de que España defenda desde o Goberno do Estado a democracia e a liberdade".

Do mesmo xeito, acusou aos nacionalistas de referirse á "ditadura de Maduro" como "un modelo político e social" e facer un chamamento a "solidarizarse coa Revolución Bolivariana". Tanto aos socialistas como aos nacionalistas convidounos a sumarse ao apoio e á solidariedade mostradas hoxe polo PPdeG coa familia de Carlos Correa, activista de orixe galega detido en Venezuela. Neste sentido, Paula Prado pediu ao Goberno de España que traballe pola liberación.

RUEDA PARTICIPARÁ NO CUMIO DE ASTURIAS

Por último, preguntada respecto diso, a número dous do PPdeG ratificou que o presidente da Xunta e líder da formación en Galicia estará presente no encontro que Feijóo manterá a fin de semana en Colunga (Asturias) cos 'baróns' territoriais do PP para abordar a súa proposta en materia de vivenda.