A Xunta declara o sector téxtil como estratéxico para impulsar a súa actividade económica
Tamén a industria alimentaria e construción serán considerados estratéxicos.
Por Europa Press / Redacción | SANTIAGO DE COMPOSTELA | 17/02/2025 | Actualizada ás 20:10
O Consello da Xunta acordou declarar tres novos sectores industriais como estratéxicos para iniciar a elaboración dos seus plans directores: industria da alimentación, sector téxtil e construción. Representan ao redor do 35% do emprego industrial de Galicia.
Estas declaracións súmanse ás realizadas en febreiro do ano pasado doutro seis sectores industriais esenciais: o metalmecánico, a automoción, a construción naval, o sector forestal-madeira, a industria do TIC, así como a loxística industrial. Estes seis sectores industrias xunto coas declaradas este luns representan máis do 85% do emprego industrial total de Galicia.
Tras a declaración, levará a cabo unha consulta pública para solicitar a opinión da cidadanía e das organizacións máis representativas do sector. Na elaboración destes plans directores tamén participarán as consellerías con competencias na materia, o sector privado e representantes dos traballadores.
Os plans directores son instrumentos para potenciar o desenvolvemento da actividade industrial nun sector concreto a través da definición das medidas necesarias para o seu impulso co obxectivo de fortalecer a industria galega e a creación e mantemento de emprego, explica a Xunta.
A alimentación representa unha cifra de negocio do 21,5% do total da industria galega e preto do 24% do total do emprego industrial en 2024. O sector téxtil e a confección representa unha cifra de negocio do 4% do total da industria galega, concentrándose fundamentalmente na elaboración de roupa de vestir, cun 7% do emprego. A construción supón o 5,7% do Produto Interior Bruto (PIB) de Galicia segundo os datos do Instituto Galego de Estatística (IGE) do ano 2023, con máis de 133.000 traballadores.
AXUDAS PARA MERCADOS DE ABASTOS
Por outra banda, o Consello da Xunta aprobou unha nova convocatoria da Consellería de Emprego, Comercio e Emigración para potenciar ás prazas de abastos como mercados excelentes, cunha achega de 3,3 millóns de euros.
