A estratexia do PPdeG: vincular as protestas de Galicia co BNG e a UPG

O portavoz parlamentario do PPdeG, Alberto Pazos, vinculou a manifestación convocada para este domingo en Santiago por SOS Sanidade Pública cos ditames "dos coroneis da UPG", facción maioritaria do BNG, "hai que montar algaradas públicas todos os fins de semana". 

E é que nas últimas semanas os populares están vinculado todos os movementos sociais co BNG e, especialmente, coa UPG, sexan ou non sexan estes movementos controlados por esta organización política, como acontece con Altri, por exemplo. Unha estratexia coa que tentan desacreditar estas protestas e auntar directamente a motivacións "políticas" e non sociais ou económicas.

O PPdeG sempre vinculou ao BNG e, sobre todo á UPG, con entidades que si controlan como a Mesa pola Normalización ou a CIG, pero agora cren que os nacionalistas "se queren apropiar" de todos os movementos de protesta ddo país.

"DOCUMENTO DA UPG"

Neste sentido, o popular mostrouse crítico coa protesta de SOS Sanidade ao asegurar que os mesmos que a convocan "son os que nos seus propios informes recoñecen o gran avance rexistrado pola sanidade pública galega nos últimos anos". "O seu único fundamento é reforzar a presión social organizada no territorio nun contexto de intensa conflitividade social. Como literalmente recolle o documento aprobado polo Comité Central da UPG o pasado mes de xaneiro, dirixido á súa militancia e executado de maneira exemplar polo BNG e todas as súas formacións satélites", sinalou.

Neste contexto, Pazos debullou que a espera para cirurxía en Galicia sitúase nos 71 días, "50 días menos que a media estatal", e asegurou que para consultas, "a espera na Comunidade galega é de 72 días, 22 días menos que a media estatal". Así, incidiu en que os datos "botan abaixo calquera intento de minusvalorar a situación da sanidade galego", así como dos seus profesionais.

Neste sentido, o popular asegurou nunha rolda de prensa celebrada este venres que a sanidade galega "pasou de estar á cola" no ano 2010 na valoración entre todas as comunidades autónomas, "a situarse nos anos seguintes nun nivel intermedio". Ademais, subliñou que, "se non lles chegan os seus propios datos", os convocantes desta manifestación tamén poden revisar os últimos datos facilitados polo Ministerio de Sanidade respecto das listas de espera.