A crise bursátil chega a PharmaMar: afúndese un 9% en Bolsa tras perder 3,95 millóns ata marzo
Por Europa Press / Redacción | MADRID | 25/04/2025 | Actualizada ás 11:35
As accións de PharmaMar esborrallábanse en Bolsa case un 9% cara ás 10.20 horas deste venres, despois de que a compañía publicase onte, co mercado xa pechado, as súas contas correspondentes ao primeiro trimestre deste ano, cando perdeu case 4 millóns de euros fronte ás ganancias de 2024.
Así, a compañía lideraba as caídas do Mercado Continuo, índice no que cotiza, ata deixarse un 8,82% e intercambiar as súas accións a un prezo unitario de 73,95 euros. Segundo informou este xoves á Comisión Nacional do Mercado de Valores (CNMV), PharmaMar rexistrou unhas perdas de 3,95 millóns de euros no primeiro trimestre deste ano, fronte ás ganancias de 2,3 millóns obtidas durante o mesmo período do exercicio anterior.
Do seu lado, a compañía farmacéutica rexistrou uns ingresos totais de 38,9 millóns de euros, o que supón un incremento do 2% respecto dos 38 millóns de euros reportados no primeiro trimestre de 2024. Por último, a débeda mantense en 48,5 millóns de euros, mentres que a posición de caixa e equivalentes a peche do primeiro trimestre sitúase en 142,2 millóns de euros.
