Fernán Vello, deputado de En Marea, pide desculpas tras chamar “ignorantes” aos galegos
O deputado de En Marea por Lugo, Miguel Anxo Fernán Vello, tivo que rectificar e pedir desculpas tras tachar de "ignorante" o pobo galego polos resultados das eleccións galegas do pasado domingo.
Por Europa Press / Redacción | MADRID | 27/09/2016 | Actualizada ás 15:14
O deputado de En Marea por Lugo, Miguel Anxo Fernán Vello, tivo que rectificar e pedir desculpas tras tachar de "ignorante" o pobo galego polos resultados das eleccións galegas do pasado domingo, nas que o PP de Alberto Núñez Feijóo revalidou a maioría absoluta. A mensaxe foi publicada na súa conta persoal en Twitter, na que cualificou os galegos tamén de "escravos" e de "pobo alienado".
Fernán Vello, un dos deputados de En Marea que ao tomar posesión proclamou que é "o pobo quen máis ordena", retirou a súa mensaxe horas despois, cando dende o PP galego xa lle pedían a dimisión.
"Rectificar é preciso", publicou a continuación. "En 'quente' podemos expresar ideas desacertadas. O pobo falou e ten todo o meu respecto. As miñas desculpas se ofendín", xustificou o deputado.
Dende o pasado domingo foron centos os chíos publicados en Twitter con duros insultos a todo o pobo galego, polos resultados das eleccións galegas, con palabras como "Subnormales", "putos", "paletos", "aldeanos", "borregos", "analfabetos", "ignorantes", "fachas", "fascistas", "gilipollas", "narcotraficantes", "corruptos"...
