Caballero recoñece que competir con Podemos "non foi unha boa idea"

O alcalde de Vigo, o socialista Abel Caballero, recoñeceu este venres que a insistencia do seu partido no último ano en competir con Podemos "non foi boa idea" e recoñece que no PSOE "se equivocaron todos".

"En aquel momento debemos formular unha dinámica política clara. Estar dedicado a competir con Podemos non foi unha boa idea. Centremos o partido na posición do centro esquerda e poñamos un líder ou unha líder que se encargue de levar nesa dirección", dixo nunha entrevista no probrama "Los desayunos de TVE", recollida por EP.

 

Preguntado sobre se se equivocou Pedro Sánchez na súa etapa como secretario xeral do partido, Caballero dixo que Sánchez "debeu dar un ultimato a Podemos para que o votaran a el ou o presidente era Rajoy". En todo caso, recalcou que se equivocaron "todos".

 

Aposta por Susana Díaz

 

Ademais, volveu insistir este luns en apostar pola presidenta de Andalucía, Susana Díaz, como futura secretaria xeral do PSOE, á vez que opinou que ao partido lle foi mellor cando non houbo bicefalia. Así, suliñou que a secretaría xeral do PSOE ten que ter unha persoa con "moito liderado" e cun "apoio orgánico moi forte".

"Necesítase unha dirección que teña un apoio serio e consistente, que conecte cos electores. Quero un proxecto gañador, non para ir subsistindo. Non quero experimentos cando se fala do PSOE" afirmou.

O socialista galego recordou que xa lle formulou a Díaz hai tres anos que "dera un paso" porque lle pareceu a "mellor situada". "Ela decidiu permanecer en Andalucía e gañou as eleccións contundentemente. Cando se fale diso nuns meses, volvereille pedir que dea o paso", apostilou.