A filla do detido por un lume doméstico: “Pido aos galegos que axuden a meu pai e que non se deixen enganar”

Sara é a filla de Miguel Ángel Martínez Novoa, exhibido antes os medios de comunicación como o primeiro detido responsable da vaga de incendios que asolou Galicia en pleno mes de outubro. Pero Miguel Ángel —recoñecido defensor da natureza entre os grupos ecoloxistas do país— só foi responsable, cando asaba chourizo, dun fogo doméstico na súa leira en Os Blancos (Ourense), onde quedou queimada menos dunha hectárea en chan da súa propiedade. Un accidente que pouco ten que ver coas máis de 35.500 hectáreas arrasadas nesta vaga de lumes que a propia Xunta cualificou como "intencionada".

Malia a decisión da xuíza, Miguel Ángel estivo aillado até o mediodía deste sábado, cando puido reencontrarse en prisión coa súa muller, Maica, e os seus fillos. Unha desconsolada Sara decidiu sacar afouteza e falar con Galicia Confidencial da situación do seu pai e da familia, e dos feitos acontecidos dende o pasado domingo negro. Dura e firme, entre bágoas, fala de "maltrato" da Garda Civil, dalgúns medios de comunicación e da Xustiza ao seu pai, acusa a Xunta de "non facer nada" e di que Miguel Ángel é un "cabeza de turco" sometido a "linchamento público". Indignados na familia, así explica Sara a GC a situación logo de poder falar por vez primeira co seu pai cara a cara, previa cita para poder velo en prisión. 

Como está a familia?

Estamos indignados pola detención do meu pai. Estamos moi mal, moi mal... Chorando moitísimo. Pero tamén sacando forzas para transmitirllas a el e darlle ánimo.

Que se dixeron?

Dixémoslle que estamos con el e que imos loitar porque isto é unha inxustiza. El díxonos que cometeu un erro, que é consiciente, pero todos sabemos que non é para tanto como se di nalgúns medios. Non falamos moito, só lle dimos ánimos e bicos para que non se derrube.

Contoulles como leva estes días?

Contounos a súa experiencia, si, e deunos a entender que o trataron bastante mal. Nós estamos indignados co trato que tivo a Garda Civil con el [a versión do detido e da familia e amigos é que se presentou voluntariamente no cuartel de Vigo e que, sen explicacións nin orde de detención, foi apresado e derrubado ao chan, retorcéndolle os brazos; logo sería levado a un centro hospitalario para ser atendido durante seis horas e pasou varios días incomunicado en prisión].

"É moi duro ver como a prensa, algúns medios, está tratando a meu pai. Estamos moi indignados".

Por que non puideron velo até o sábado, cando a xuíza ditou prisión provisional sen fianza pero comunicada?

No momento que o detiveron fomos a comisaria, pedimos velo ou falar cando menos con el por telefono, pero só lle deixaron un minuto a miña nai cando o levaron a prisión. Dende entón non soubemos nada del, como estaba... Non deixaron. E para poder velo tivemos que ir pedir cita previa, que nola deron para este sábado. Dende o mércores estivo totalmente incomunicado até este sábado. E cando fumos velo a prisión só puidemos falar con el 40 minutos no locutorio.

Como están asimilando todo o rebumbio mediático que suscitou a detención do seu pai, a exhibición pública que se fixo del, detido e levado ante xornalistas e cámaras?

Estamos fatal [chora desconsolada]. É moi duro ver como a prensa, algúns medios, están tratando a meu pai. Estamos moi indignados co trato que lle están dando algúns medios. Lin cada cousa sobre o meu pai nalgúns xornais que... Estou fatal [voz crebada]. Así que eu estou movéndome moito en redes con xente que nos coñece, porque meu pai é ecoloxista puro e duro, cen por cen. Os grupos ecoloxistas e todo o mundo que o coñece están indignados e deféndeno a morte.

"Non é normal que se poña toda a atención sobre meu pai cando arderon máis de 35.500 hectáreas e non hai responsables dos incendios que de verdade queimaron Galicia".

Que pensan?

Estamos moi indignados co trato que lle deron tanto os medios como a Garda Cicvil e a Xustiza. Todo é desmesurado, tamén a condena que lle piden por unha imprudencia na que arderon catro arbores. Meu pai é un cabeza de turco puro e duro. Non é normal que se poña toda a atención sobre meu pai por esta nimiedade cando arderon máis de 35.500 hectáreas e non hai responsables dos incendios que de verdade queimaron Galicia.

E da Xunta?

Ninguén se puxo en contacto con nós. Non fan nada. Mesmo a investigacion estamos a facela nós, porque eles, Goberno, Xustiza e Policía, non moveron un dedo. O mais doado é buscar un cabeza de turco, penso xa non como filla, senón como cidadá. Isto é un linchamento público; parace como un complot...

"Ninguén foi investigar, a recoller probas, todo seguía este sábado no seu sitio como quedou polo lume o domingo. Como van investigar os incendios se nin sequera recollen probas?".

A que se refire con que están facendo vostedes a investigación?

Na tarde deste sábado fomos á leira onde se produciu o lume e atopamos alí todo tal cal o describe meu pai para explicar que sucedeu, que foi un accidente. Alí, tirados no solo e calcinados seguían, case unha semana despois do fogo, o móbil e as chaves do coche que di que se lle caeron cando tentou apagar o lume e pedir axuda; alí seguía igual o lugar onde fixo o lume... Ninguén foi alí investigar, a recoller probas, todo seguía na tarde deste sábado no seu sitio como quedou polo lume. Como van investigar os incendios se nin sequera recollen probas? Ademais, alí ardeu menos dunha hectárea e alí seguía todo. Este é un exemplo de como se investigan os lumes. Por iso chamamos pola tarde á Garda Civil para que o vise. É obvio que o lume foi involuntario, pequeno e dentro da nosa leira.

Ten algunha mensaxe que enviar a alguén?

Si. Eu pido sobre todo ao pobo galego, ao pobo da nosa terra, que nos axude, que axude a meu pai, que non se deixe enganar e que loite pola nosa natureza, que é o que fixo sempre meu pai; os ecoloxistas loitamos sempre pola nosa natureza, por iso pido aos galegos que loiten para que se faga xustiza, non so co meu pai, senón con todo este problema dos incendios, e que busquen aos verdadeiros culpables. Hai que poñerse en pé; o pobo unido pode facer moitas cousas.