Os galegos somos os que menos viaxamos en España
Unha enquisa do Instituto Nacional de Estadística (INE) describe Galicia como un dos territorios do Estado español no que menos se viaxa. Os motivos poden ir desde os económicos, enfermidade ou falta de tempo para poder moverse fóra.
Por Galicia Confidencial | Santiago | 11/08/2018 | Actualizada ás 22:00
A investigación do INE de xuño de 2018, sitúa Galicia e Andalucía como territorios onde a xente non parece ter moitos motivos para facer viaxes de tipo persoal, non só por vacacións. O caso é que do total enquisado polo Instituto, o 34% de españois non viaxa e os motivos son diversos.
No caso galego é máis do 40% as persoas sen interese en desprazárense. O 50% das enquisadas que non viaxan é por falta de diñeiro. O outro 50% repártese entre as persoas que non o fan por motivos de saúde e quen simplemente prefire quedar na casa, resolver os seus asuntos desde o fogar ou botar as vacacións na súa residencia.
Os compromisos laborais, cun 17%, son outro motivo polo que a xente non ten motivos para saír fóra, mentres que os motivos familiares levan un 13%. Hai máis motivos pero en xeral pesa sobre todo o económico para realizar movementos que mesmo inclúan por motivos de traballo ou estudos. O caso é que Galicia non parece ter moito interese nas viaxes, sobre todo nas de pracer, pero tampouco nas que as cuestións laborais ou académicas podan ser o motor dos desprazamentos.
Por outra banda, as mulleres viaxan máis que os homes, cun 51% fronte ao 49% dos homes. Máis do 66% de movementos fanse dentro do territorio estatal, algo menos do 29% viaxan tanto por territorio español como polo estranxeiro. Só un pouco máis do 8% se move polo estranxeiro unicamente. As cuestións xeracionais tamén pesan no momento de decidirse. Dos 15 aos 34 anos máis do 75% móvense dentro e fóra das fronteiras estatais.
O número baixa dúas décimas entre persoas entre 35 e 44 anos. Dos 45 aos 64 anos a cousa vai diminuindo cara un 60%. A partir dos 65 anos o número de movementos ou viaxes diminúe de maneira destacable. Dentro de colectivos familiares son as parellas sen fillos as que máis se desprazan e adulto con neno os que menos.
