As alternativas de En Marea para as Europeas: Podemos, Compromís ou Varoufakis
Serán os inscritos os que teñan que decidir con que aliados quedan, aínda que Compromís gaña enteiros. A nova dirección da formación evita polemizar as divisións internas de Podemos ou Anova.
Por Europa Press / Redacción | SANTIAGO DE COMPOSTELA | 26/01/2019 | Actualizada ás 14:09
En Marea prevé pechar en febreiro unha "alianza ampla" para concorrer ás eleccións europeas, que os inscritos terían que ratificar en marzo e para a que se manteñen conversas con posibles aliados como Podemos, Compromís ou Diem25 de Varoufakis.
Así o transmitiu Ana Seijas, integrante da coordinadora, tras unha reunión celebrada este sábado, á que non asistiu o portavoz, Luís Villares, a pesar de estar previsto, e na que a formación avanzou na súa postura sobre os Orzamentos Xerais do Estado e na elaboración dun "banco de ideas" común para as mareas municipalistas.
Un dos primeiros puntos abordados foi a coalición das eleccións europeas. Ana Seijas non quixo valorar a proposta do confundador de Anova, Xosé Manuel Beiras, de que esta formación se sume á coalición de BNG, EH-Bildu e ERC, e que xa foi rexeitada esta semana polo Bloque e corrixida pola propia Anova.
Seijas resolveu que "é un tema de Anova" que non lle compete a En Marea" e, aínda que cre que "a vía xa está pechada por Anova", replicou que En Marea "é unha organización nacional e de inscrición individual".
Tamén rexeitou valorar as posibles repercusións a En Marea da situación interna que atravesa Podemos. Aínda que o partido de Pablo Iglesias está nun "momento complicado", "non ten máis transcendencia" porque é algo que "forma parte da vida dos espazos políticos", respondeu na rolda de prensa Mariló Candedo, membro da coordinadora.
CANDIDATURA AMPLA PARA UNHA EUROPA DAS PERSOAS
Desta forma, a actual dirección de En Marea centrouse en avanzar os seus prazos de cara as europeas de maio, ao redor da idea de pechar unha "candidatura ampla", con formacións que aposten por unha "Europa das persoas" e "democrática" e que os inscritos voten en marzo.
En Marea aposta por pechar "unha candidatura galega, de país, que defenda os intereses dos galegos, que poña de relevo as necesidades e as expectativas de toda a sociedade galega, non dunha parte".
Con este fin, Seijas explicou que a dirección de En Marea iniciou o "diálogo con diversas formacións políticas" que entenden o "espazo político galego" e a "plurinacionalidade do Estado", para pechar unha coalición "o máis ampla posible que permita que os galegos teñan voz en Europa". Preguntada sobre os seus posibles aliados, citou a Podemos, a Compromís e a Diem25 do grego Yanis Varoufakis, pero sen "pechar portas" a outras alianzas.
"LÍNEA DE DIÁLOGO" CO GOBERNO POLOS PGE
En canto aos orzamentos presentados polo Partido Socialista, Mariló Candedo avanzou que "a dirección" de En Marea abriu "unha liña de diálogo co Goberno". As esixencias de En Marea sairán da Axenda Galega do Cambio e concretaranse nunha reunión da dirección galega o sábado con "os deputados do Congreso".
"O apoio aos orzamentos dependerá da receptividade das nosas propostas no Goberno de Pedro Sánchez, estamos abertos, aínda que partimos do 'non' inicial", subliñou.
"BANCO DE IDEAS" PARA As MUNICIPAIS
Por outra banda, Seijas avanzou que En Marea "está a traballar nun Banco de Ideas" para as eleccións municipais, construído de forma "colaborativa" coas Mareas locais, os inscritos e as áreas sectoriais, coa previsión de realizar en febreiro "encontros deslocalizados" para decidir as "liñas concretas".
Un Banco de Ideas no que se plasmará a "idea de concellos" que defende En Marea, pero deixando marxe á "diversidade" e "necesidade" das distintas localidades, e que se exporá en marzo, "nun encontro municipalista" no que se presentará este traballo e participarán as "Mareas locais".
