Unha trintena de traballadores protesta na Coruña contra o ERE de Vodafone
Segundo CC.OO., os despedimentos afectarían ao 25% do persoal, o que inclúe a 40 persoas en Galicia.
Por E.P. | A CORUÑA | 31/01/2019 | Actualizada ás 14:54
Unha trintena de traballadores de Vodafone, tal como aseguran fontes de CC.OO., concentrouse este xoves ás portas da sede da empresa na Coruña para protestar contra o ERE de extinción que prevé a compañía de telecomunicacións.
En declaracións a Europa Press, o delegado de CC.OO. no comité de Empresa, Pedro Amigo, indicou que o ERE suporía o despedimento de preto do 25% do persoal, 1.200 en toda España, e máis de 40 en Galicia.
A concentración foi convocada polo comité de empresa, formado por CC.OO. e UXT. Baixo o lema "Non ao ERE de extinción", o persoal pide que a compañía cambie de parecer e que "paralice" o ERE.
A mesa de negociación coa parte sindical finaliza a finais do mes de febreiro. De continuar co ERE, as saídas dos traballadores produciríanse entre os meses de marzo e xullo, segundo comentou Amigo.
