A oposición critica que Almuiña non compareza sobre o caso do 061 en Dozón e o PP di que "é precipitado"
Puy xustifica o 'non' do grupo maioritaria ao volume de asuntos no próximo pleno e defende o funcionamento "exemplar" do 061.
- Sindicatos atribúen á "falta de recursos" que unha ambulancia tardase 46 minutos en chegar
- Unha ambulancia tardou de Silleda a Dozón 46 minutos para atender a un home que faleceu nese tempo
Por E.P. | SANTIAGO DE COMPOSTELA | 15/10/2019 | Actualizada ás 14:47
A oposición no Parlamento de Galicia criticaron ao PPdeG por "vetar" a petición de comparecencia do conselleiro de Sanidade, Jesús Vázquez Almuiña, formulada polos grupos para que ofrecese explicacións ante a Cámara sobre o falecemento dun home o pasado fin de semana en Dozón (Pontevedra), emerxencia que unha ambulancia do 061 tardou 46 minutos en atender desde que recibiu a chamada ata que chegou ao lugar.
Na rolda de prensa posterior á xunta de portavoces da Cámara galega, o representante do grupo maioritario, o popular Pedro Puy, xustificou que a decisión de oporse a que Almuiña acuda ao pleno da próxima semana radica no volume de asuntos incluídos na orde do día da sesión e en que aínda "é precipitado" que o conselleiro acuda ao hemiciclo a informar sobre un suceso rexistrado fai catro días.
"A Xunta analizará as circunstancias e cando teña a información trasladaraa á Cámara. Neste momento é precipitado", asegurou Puy a preguntas dos medios despois de que os portavoces da oposición --PSdeG, Común da Esquerda, BNG e En Marea-- censurasen a postura dos populares de non permitir unha petición formulada polo catro grupos.
Todos eles afearon ao PPdeG o que consideran un intento de "non dar explicacións" sobre un suceso "gravísimo" que cren consecuencia da política sanitaria autonómica e a "falta de recursos" do Sergas. "A Xunta tería que ser a primeira interesada en tratar estes asuntos doutra maneira", manifestou o portavoz socialista, Xoaquín Fernández Leiceaga, que esixiu "máxima transparencia" para casos que, segundo o do PSdeG, "son evitables" como o de Dozón.
Manuel Lago (Común da Esquerda) tachou de "indigno" e "covarde" ao Goberno galego por "non dar explicacións" sobre este caso e por tamén negarse a que comparecese neste pleno a titular de Política Social, Fabiola García, para dar conta da situación nas residencias de maiores, que presentan "o índice de sinistralidade laboral máis alta" de Galicia.
Para Olalla Rodil (BNG), o caso de Dozón é o reflexo de "as consecuencias dramáticas e dolorosas" que leva a "falta de recursos" da sanidade pública e, en concreto, do servizo de urxencias médicas. "Por que tardan 46 minutos en atender unha emerxencia? Porque hai unha grave diminución de dotación de recursos", incidiu Rodil, que lembra que a comarca do Deza "só ten tres ambulancias, ningunha medicalizada, para cubrir un territorio de 3.700 metros cadrados".
Pola súa banda, o portavoz do grupo mixto, Luís Villares, lamentou que o PPdeG considere que se trate dun asunto "non tan importante" como para que comparecese o conselleiro como máximo responsable do servizo. "Queremos claridade das causas e que se extraian conclusións", esixiu.
PP: "RETRATA" Á OPOSICIÓN
Cuestionado sobre as críticas vertidas pola oposición cara á actitude do PPdeG e o Goberno galego, Pedro Puy valorou "a capacidade de acción" parlamentaria e "control" ao Executivo que, di, teñen os grupos no Parlamento de Galicia. "O Goberno sempre dá a cara", apostilou o portavoz popular, que, para sustentar esta postura, convidou a "contrastar" as "cifras" doutras cámaras coas do Pazo do Hórreo.
Ademais, tras defender o funcionamento "exemplar" de Urxencias Santiarias 061 --"un dos servizos máis valorados"--, Pedro Puy censurou que "unha vez máis" a oposición empregue "desgraciados acontecementos" rexistrados na sanidade pública para "facer política".
"Paréceme ben que no debate estea a mellora dos servizos sanitarios, pero facer política desta maneira retrata a quen propón este tipo de debates", sentenciou o portavoz popular.
