Galicia cae ata o terceiro posto en bandeiras azuis, a pesar de incrementalas a 111
Sanxenxo é o concello con máis areais con bandeira azul, once en total.
Por Europa Press / Redacción | SANTIAGO DE COMPOSTELA | 11/05/2021 | Actualizada ás 13:43
As praias galegas recibiron este ano un total de 111 bandeiras azuis, o que supón catro máis que as outorgadas o ano pasado, aínda que, en cifra global, Galicia cae ao terceiro posto entre comunidades, superada nestes distintivos tanto pola Comunidade Valenciana, como o pasado ano, como por Andalucía.
Na edición 2021 solicitaron estas distincións 115 praias galegas, unha máis que o ano anterior, e recibíronas 111, catro máis. Correspóndense con 34 municipios, dos que 14 están na Coruña, 12 en Pontevedra e oito en Lugo.
Nesta ocasión, España obtivo un total de 713 Bandeiras Azuis (615 praias, 96 portos deportivos e dous en embarcacións turísticas sustentables) que ondearán a partir de xuño, o que supón 25 máis respecto ao ano pasado. Deste xeito, España, con 25 praias e 2 portos máis, mantén o seu liderado internacional. Séguenlle nesta clasificación a nivel internacional, Francia, Italia, Grecia, Turquía e Portugal.
En concreto, o número de municipios litorais españois participantes en 2021 é de 249, cinco máis que en 2019, dos que 676 praias foron candidatas, 14 máis que o ano pasado. Ademais, 15 praias recibiron por primeira vez o galardón 'Bandeira Azul', mentres que 34 praias recupérano do ano anterior.
Por comunidades, a Comunidade Valenciana continúa liderando o número de Bandeiras Azuis en España con 153, 137 en praias e 16 para portos. Séguenlle Andalucía con 137 'Bandeiras azuis', 115 en praias, 20 en portos e 2 en embarcacións; e Galicia con 122 distintivos, dos cales 111 son para praias e 11 para portos. O pasado ano, Galicia ocupaba o segundo posto, tras Valencia.
SANXENXO, Á cabeza
En canto ás provincias galegas, é a de Pontevedra a que obtén, un ano máis, o maior número de bandeiras azuis, con 58 --sobe seis--; seguida da Coruña, con 35 --dous menos-- e Lugo, que mantén as 18.
Por municipios, destaca especialmente Sanxenxo, que, con 17 bandeiras azuis ondeando nos seus areais, continúa sendo o municipio de Galicia e de toda España con máis distincións deste tipo.
Así mesmo, na provincia de Pontevedra contan con bandeira azul 10 praias de Vigo --entre elas a de Rodas, en Illas Cíes--, sete de Cangas, seis de Baiona, cinco de Marín, catro de Bueu, dous da Guarda, A Illa e Vilagarcía e unha de Moaña, Poio e Ponte Caldelas --neste caso, de interior, a praia fluvial A Calzada--.
No caso da provincia da Coruña, Arteixo é o municipio que obtén máis bandeiras azuis, con sete; seguido de Oleiros e A Coruña, con cinco cada un; Ferrol, con catro; e Carballo e Ponteceso, con tres. Ademais, hai unha praia distinguida na Laracha, Bergondo, Camariñas, Dumbría, Laxe, Miño e Ribeira, ademais de en As Pontes de García Rodríguez, que estrea bandeira azul para a praia do seu lago.
Finalmente, en Lugo é Foz o municipio con máis bandeiras azuis para as súas praias, un total de cinco. Pola súa banda, tanto Barreiros como Burela teñen tres, O Vicedo e Ribadeo dous --entre elas As Catedrais-- e Cervo, Viveiro e Xove unha cada un.
PORTOS DEPORTIVOS
Noutra orde de cousas, tamén obtiveron bandeira azul en Galicia un total de 11 portos deportivos, un menos que o ano anterior.
Por provincias, cinco deles están en Pontevedra --Monte Real Club de Iates de Baiona, Porto Deportivo de Cangas, Real Club Náutico de Sanxenxo, Club Náutico Portonovo e Porto Deportivo Juan Carlos I de Sanxenxo--, cinco na Coruña --Real Club Náutico da Coruña, Club Náutico de Boiro, Club Náutico de Sada, Porto Deportivo Sadamar e Real Club Náutico de Portosín--, e un en Lugo --Real Club Náutico de Ribadeo--.
Finalmente, foron galardoados 13 'centros azuis' --seis en Pontevedra, catro na Coruña e tres en Lugo--, así como unha vintena de 'carreiros azuis' --nove de Pontevedra, seis da Coruña e cinco de Lugo--.
Estes carreiros son, na Coruña, a Senda Azul Litoral da Coruña, o Sendeiro de Saldoiro da Laracha, a Senda Azul de Arteixo, a Ruta Litoral de Camariñas, a Senda do Mar Razo-Baldaio, e a senda Costa Libre de Oleiros.
En Lugo, pola súa banda, están distinguidas a Ruta do Litoral Burelense, o Sendeiro Azul do Torno de Cervo, o Paseo Ruta das Praias de Foz, a ruta de Fuciño do Porco do Vicedo e a Ruta do Faro de Illa Pancha ás Aceas, en Ribadeo.
Finalmente, en Pontevedra, recibiron o distintivo azul a Senda Litoral da Guarda, a Senda Perimetral Bao-Xastela da Illa, o Carreiro Litoral de Baiona, o Carreiro de Cabo Udra de Bueu, o Roteiro de Donón en Cangas, a Rede de Carreiros Azuis de Marín, o Carreiro do Río Verdugo de Ponte Caldelas, a Rede de Carreiros de Sanxenxo e a Rede de Carreiros de Vigo.
