O PSdeG insta a Xunta a declarar "de inmediato" BIC os bens mobles de Meirás
Sen esquecer reivindicar a figura de Pardo Bazán, o secretario xeral do PSdeG asegura que a recuperación do pazo se fixo "por memoria democrática": "Esa ten que ser a finalidade fundamental", engade.
- Os Franco piden investigar a Avogada Xeral por prevaricar no inventario do Pazo de Meirás
- Os primeiros visitantes civís ao Pazo de Meirás, "encantados" de que "a historia volva onde pertence"
Por E.P. | SANTIAGO DE COMPOSTELA | 09/08/2021 | Actualizada ás 18:19
O secretario xeral do PSdeG, Gonzalo Caballero, instou a Xunta a declarar "de inmediato" Ben de Interese Cultural (BIC) os bens mobles do Pazo de Meirás "para evitar que os Franco poidan retirar estatuas, cadros e outro mobiliario". "Que quede dentro do público", sinalou nunha visita xunto a outros representantes socialistas e nun acto no que cualificou como "demanda histórica do país" que o inmoble pase a ser patrimonio do público, por unha sentenza provisional.
Ademais de reivindicar o logro por parte dun "goberno progresista", dixo que con iso se cumpre "co que demandan os represaliados". "Unha necesidade de xustiza histórica", apostilou. "Instamos o goberno da Xunta a que declare BIC os bens mobles que están en Meirás", insistiu Caballero ao reclamar "protección" para eles e que o mobiliario "quede dentro do público".
Por outra banda, sen esquecer reivindicar a figura da escritora Emilia Pardo Bazán, asegurou que a recuperación de Meirás "se fixo para condenar o franquismo e reparar a memoria das vítimas". "Por memoria democrática, esa ten que ser a finalidade fundamental", apostilou.
