Detida por roubar 28.000€ a unha amiga que sufriu un deterioro cognitivo
Está acusada de sacala da residencia na que estaba internada para retirar cartos do banco. Piden nove anos de cárcere.
Por E.P. | SANTIAGO DE COMPOSTELA | 11/09/2021 | Actualizada ás 11:06
Unha exempleada dun banco enfróntase a unha petición de nove anos de cárcere por estafar e roubar a unha amiga aproveitándose de que a vítima padecía unha deterioración cognitiva polo que fora internada nunha residencia. O xuízo contra esta muller terá lugar o vindeiro mércores 15 de setembro na sección sexta da Audiencia Provincial da Coruña, con sede en Santiago de Compostela.
A procesada está acusada de dous delitos, un de estafa continuado e un de roubo con forza en casa habitada, polos que Fiscalía pide unha pena de 9 anos de cárcere, así como a devolución dos case 28.000 euros que, supostamente, obtivo duns feitos que ocorreron entre abril do ano 2018 e marzo de 2019.
Durante esa época, segundo sostén o Ministerio Público no seu escrito de acusación, a acusada visitaba á vítima, con quen mantiña unha amizade, na residencia de Santiago na que fora internada polos seus familiares debido aos seus episodios de desorientación froito da deterioración cognitiva que padecía.
A procesada sacaba á vítima da residencia coa escusa de ir pasear ou a dar unha volta pola cidade. Fiscalía sostén que, valéndose do seu estado de saúde, en nove ocasiones levouna á entidade bancaria na que traballou para, "aproveitándose da súa credibilidade" como exempleada, retirar distintas cantidades de diñeiro dunha conta a nome da vítima.
En total, está acusada de quedar con case 18.000 euros procedentes destas operacións e doutra ocasión na que fixo un reintegro a través dun cheque desde unha conta distinta que a vítima tiña noutra entidade financeira.
ROUBO NA CASA
A procesada tamén se enfronta a un delito de roubo en casa habitada, posto que, supostamente, entrou na vivenda da vítima en xaneiro de 2019 empregando unhas chaves que posuía froito da súa relación de amizade para levar varios obxectos valiosos.
No domicilio atopouse coa empregada do fogar que traballaba para a vítima, á que explicou que acudira á casa a recoller "unhas cousas que estaban nun armario pechado". A empregada creu a versión da agora acusada e entregoulle as chaves do moble.
Fiscalía acusa á procesada de levar do interior do armario varios títulos de propiedade, un abrigo de visón valorado en 600 euros e diversas xoias taxadas en case 9.000 euros.
