O Goberno promete baixar o prezo da luz e os carburantes "nunha semana"
O Executivo non apunta canto reduciarán o prezo nin se se recuperarán valores previos á guerra ucraína. A luz leva baixando sostidamente varias xornadas. Pola súa banda, no sector pesqueiro avanzan que continuarán sen saír ao mar e piden unha solución inmediata.
- Empresarios galegos urxen medidas ao Goberno para frear a suba de prezos na enerxía detrás da folga de transporte
- O desabastecemento das lonxas ameaza con deixar sen peixe os grandes supermercados de Galicia
- O prezo da luz mantense por baixo dos 250 euros/MWh este sábado
Por Europa Press / Redacción | SANTIAGO DE COMPOSTELA | 19/03/2022 | Actualizada ás 11:25
A ministra de Política Territorial e Portavoz de Goberno de España, Isabel Rodríguez, mostrouse confiada este venres en que "dentro dunha semana" poderá anunciar desde a Mesa do Consello de Ministros que o prezo da enerxía baixou en España e que os cidadáns "pagarán menos polos carburantes, a electricidade e o gas". Non apuntou, iso si, cando baixará a enerxía e se o prezo desta recuperará valores previos á guerra ucraína.
Nas últimas xornadas o prezo da luz xa foi á baixa, xa que pasou de superar os 500€/MWh ata os 221,91 euros do sábado 19; unha cifra coa que se mantén por terceira xornada consecutiva por baixo da cota dos 250 euros/MWh, ao redor da cal se estabilizou desde o fin de semana pasado. Polo tanto, a promesa do Goberno resulta máis ben relativa, tamén porque o decreto orientado a baixar os prezos non entrará en vigor até o día 29 deste mes, é dicir, en dez días, non nunha semana.
En calquera caso, así foi como se manifestou Rodríguez durante a súa intervención na gala de premios anuais de Onda Cero en Puertollano. A ministra apelou á unidade de todos os españois e europeos para facer fronte aos desafíos que expón a invasión rusa de Ucraína, planeada por "seres sen alma que matan a inocentes", e as súas derivadas económicas.
Neste sentido Rodríguez lembrou que este venres o presidente Pedro Sánchez mantivo unha reunión co chanceler alemán Olaf Scholz para axuntar posturas e reiterar que "é inxusto que os cidadáns estean a pagar o prezo de electricidade rexistrado no últimos oito meses". "Para que podamos conseguir unha factura que podamos pagar non vale só con baixar os impostos, senón tamén o prezo da enerxía", dixo en referencia á desvinculación do prezo do gas no mix enerxético. "Niso é no que estamos a traballar, e teño a confianza de que nunha semana, desde a mesa do Consello de Ministros, poderei anunciarvos que o prezo da enerxía baixou no noso país e pagaremos menos polos carburantes, pola electricidade e polo gas", subliñou.
CONFRADÍAS
Na mesma xornada, a frota pesqueira do Estado, que permanecerá amarrada a porto ata o vindeiro mércores pola situación derivada da subida de prezos, urxiu ao Goberno a tomar medidas xa. En declaracións a Europa Press, o presidente das confrarías españolas e patrón maior de Burela, Basilio Otero, lembrou que o amarre se estenderá ata o vindeiro mércores, xornada na que está prevista unha reunión co ministro de Agricultura, Pesca e Alimentación, Luis Planas, para buscar solucións. "Esperemos que saia un bo resultado da reunión e do propio goberno, se non amañamos non vai haber pescado nin vai haber outra cousa", sinala.
