A CIG desmárcase do convenio de industrias lácteas por "non garantir incrementos co IPC real"

A CIG non asinou o convenio estatal para as industrias lácteas porque o considera "insuficiente" e por "non garantir incrementos co IPC real", algo que ven como unha "condena ao persoal do sector" e que os levou a non querer participar nun "brinde á precariedade".

Segundo a central nacionalista, o convenio concluíu cuns avances "insuficientes" e sen garantías en aspectos como "non asegurar o tempo suficiente para asistencia ás consultas médicas e de acompañamento de fillos e proxenitores de idade avanzada" ou en "darlle solución ás situacións de indefinición que provocan os repousos domiciliarios con prescrición facultativa cando non se emite baixa médica".

Ademais, a CIG argumentou que tampouco se garante o "complemento total durante a situación de baixa médica" nin tampouco "o acceso á situación xubilación parcial para o persoal que cumpra os requisitos".

No plano económico, o sindicato criticou que se pactou un modelo de incrementos salariais "en diferido" e con aplicación práctica en "cómodos prazos". Así, indicaron que para o ano 2021, "cun IPC real do 6,5%", ao persoal "unicamente se lle repercutirá o 3,5% do incremento".

Neste sentido, denunciou que no 2022, 2023 e 2024 "o incremento provisional será do 1%" e establécese unha anotación sobre os salarios que "queda limitada no 2,5% aínda que o IPC real puidese ser superior".

PATRONAL, CCOO E UGT SUBSCRIBEN O CONVENIO

A Federación Nacional de Industrias Lácteas (FeNIL) asinou este luns con UGT e CCOO este convenio colectivo, que se aplicará en todo o territorio estatal ás empresas do sector durante catro anos e que beneficiará a 20.000 traballadores, segundo informou nun comunicado.

En concreto, e tras esta firma, entra en vigor un convenio que contempla unha suba salarial ligada ao IPC real cun incremento a conta do 1% para 2022, 2023 e 2024.

Así mesmo, o texto recolle unha suba salarial do 3,5% en 2021, no que se pagarán atrasos desde o 1 de xaneiro do 2,5% ao dar xa un 1% a conta. Os atrasos para o período 2022-2024 quedarán topados ao 2,5% en cada ano.

O novo convenio incorpora novas medidas sociais e de conciliación que "contribuirán a fomentar o benestar persoal e laboral dos profesionais do sector e que mellorará a estabilidade laboral nas zonas rurais e á fixación de poboación".

Este convenio terá unha vixencia de catro anos, de 2021 a 2024, e amplía a súa cobertura á elaboración de sobremesas lácteas. O texto afecta a preto de 20.000 persoas traballadoras e a máis de 1.000 empresas do sector.