O 'Mercado da Reserva' de Allariz premiado a nivel nacional

A Rede de Municipios pola Agroecoloxía outorgou o premio ‘Cidades e pobos que alimentan 2022’ ao mellor proxecto desenvolvido por un pequeno municipio ao Mercado da Reserva promovido dende o Concello de de Allariz. O recoñecemento chega por traballar para a visualización dos proxectos agroecolóxicos da zona e lograr un proxecto participado por persoas labregas, así como pola súa consolidación como espazo de intercambio e xeración de relacións despois de dez anos de traxectoria.

A entrega dos premios “Cidades e Pobos que Alimentan” celebrouse en Castelló da Plana, no encontro anual da Rede de Municipios pola Agroecoloxía que tivo lugar os días 6 e 7 de outubro, onde participaron máis dunha vintena de consistorios de todo o territorio xunto a organizacións sociais dedicadas á promoción da agroecoloxía. Esta primeira edición de premios pola agroecoloxía, única en todo o territorio, serviu  para visualizar as mellores prácticas por unha alimentación sostible, empezando por Allariz, Valencia, Granollers, Valladolid e Eo Alimenta.

Á entrega de premios asistiron representantes dos ministerios de Consumo e Axenda 2030, a alcaldesa de Castelló e concelleiras de consistorios do estado.