Trasladado un home en helicóptero ao hospital logo de envorcar o tractor que conducía
Tamén quedou ferido un conductor dun coche que tivo que ser excarcerado en San Sadurniño
Por Europa Press / Redacción | SANTIAGO DE COMPOSTELA | 01/02/2023 | Actualizada ás 19:50
O condutor dun coche que sufriu un accidente na AG-64, en San Sadurniño, tivo que ser excarcerado do vehículo, antes de ser trasladado a un centro sanitario. Segundo informou o CIAE 112 Galicia, o sinistro produciuse pouco antes das 14,00 horas deste mércores, cando un particular chamou a Emerxencias para alertar sobre un coche accidentado no quilómetro 13 da AG-64, ao seu paso por San Sadurniño, en dirección a Ferrol.
O 112 deu aviso a Urxencias Sanitarias de Galicia-061, aos Bombeiros do Eume, á Garda Civil de Tráfico e aos servizos de mantemento da estrada. Foron os efectivos de bombeiros os que, facendo uso do seu material de excarceración, lograron liberar ao ferido.
ENVORCO DUN TRACTOR
Por outra banda, o 112 tamén informou dun accidente de tractor ocorrido en Val do Dubra á primeira hora da tarde. Un particular alertou de que un home envorcara cando conducía un tractor polo monte en Erviñou.
Aínda que nun primeiro momento parecía que podía estar atrapado, o home logrou saír de debaixo do vehículo polos seus propios medios e foi trasladado en helicóptero medicalizado a un centro hospitalario. No operativo tamén participaron axentes da Garda Civil e efectivos de Protección Civil de Val do Dubra.
