Baltar di que o termalismo "é saúde" e que desde Ourense ofrecerán "a versión máis brillante"

O presidente da Deputación de Ourense, Manuel Baltar, defendeu o termalismo como "un ben de interese xeral, que repercute no beneficio de todos" durante o transcurso da inauguración do XVI Encontro de Vilas Termais, organizado no balneario do concello ourensán de Arnoia pola Federación Española de Municipios e Provincias (FEMP).

Baltar, presidente tamén da Asociación Europea de Cidades Históricas Termais, subliñou que o termalismo "é unha peza angular no desenvolvemento dos nosos territorios" e por iso cualificou como "un deber e unha obrigación" o apoio da Deputación a un encontro que, este ano, converteu a localidade de Arnoia "na capital do termalismo nacional" coa participación de representantes de enclaves termais de toda España.

Pondo de relevo a importancia do "impulso á consideración da auga termal como saúde", Manuel Baltar manifestou que "desde Ourense se tentará ofrecer a versión máis brillante do termalismo", e, en calidade de presidente da Asociación Europea de Cidades Históricas Termais, resaltou o traballo levado a cabo polas entidades que traballan no ámbito do termalismo "tanto desde o punto de vista turístico como da saúde".

No acto inaugural participaron tamén o alcalde de Cuntis e presidente da sección de Vilas Termais da Federación Española en Municipios e Provincias, Manuel Campos, a directora da Axencia de Turismo de Galicia, Nava Castro, e como anfitrión o alcalde de Arnoia e vicepresidente da citada sección termal da FEMP, Rodrigo Aparicio.

IMPLICACIÓN DA XUNTA

Nava Castro defendeu a implicación da Xunta de Galicia co termalismo, asegurando que se incluíron as vilas termais con centros históricos nos plans territoriais cos que se optan aos fondos europeos. Ademais destacou a recente creación da área termal da Xunta de Galicia, "que terá a súa sede en Ourense" actuando como "interlocutor" para todas as vilas e balnearios da comunidade.

Pola súa banda, Campos puxo énfases na "importancia maiúscula" da sección de Vilas Termais da FEMP, vilas que, en toda España, sinalou, teñen como "característica principal" estar situadas en pobos pequenos "co que implica este sector como motor económico". Ás súas palabras sumáronse as de Rodrigo Aparicio, que fixo un chamamento a aproveitar as oportunidades que ofrecen os fondos europeos de recuperación.

O encontro celébrase ata este sábado. Este, ademais da primeira sesión de traballo no balneario de Arnoia, presentáronse experiencias turísticas saudables entre as que figuraba o proxecto "Ourense termal", as termas de Prexigueiro e a ruta de enoturismo de Ribadavia.

Ademais visitaron o Pazo Provincial para ver o proxecto do Gran Balneario de Ourense. "Será unha realidade en 2027", prometeu Baltar, apostilando que ademais será "o motor económico da cidade e de toda a provincia, así como unha das postais de Galicia".

COÑECERON CABREIROÁ

Os asistentes ao encontro tamén se desprazaron ata a vila termal de Verín para coñecer o recinto balneario de Cabreiroá e as antigas instalacións de Caldeliñas. Este sábado, o programa comezará coa presentación dun proxecto da FEMP que se enmarca no plan "Experiencias Turismo España", dentro do Mecanismo de Recuperación e Resiliencia. As axudas para proxectos de enerxía limpa en municipios de reto demográfico; unha presentación sobre a historia da EHTTA; o 150 aniversario da vila termal de Mondariz; e a presentación de Termatalia Uruguai 2023 completarán unha xornada que tamén contempla visitas a Arnoia e Ribadavia.

O presidente da Deputación de Ourense defende o termalismo como 'un ben de interese xeral'. XUNTA | Fonte: Europa Press