O PSdeG esixe a Sanidade que garanta a interrupción voluntaria do embarazo en centros públicos
Considera "de todo punto inadmisible" o concurso presentado pola Consellería de Sanidade en agosto para externalizar o servizo
Por Europa Press / Redacción | SANTIAGO DE COMPOSTELA | 26/08/2023 | Actualizada ás 14:29
A portavoz de Igualdade do Grupo Socialista, Noa Díaz, esixiu á Consellería de Sanidade que garanta que as mulleres galegas poidan exercer o seu dereito á interrupción voluntaria do embarazo no centro público máis próximo e con persoal sanitario que non apele á obxección de conciencia.
A responsable socialista presentou unha batería de iniciativas parlamentarias para reclamarlle ao goberno galego que garanta o cumprimento pleno en Galicia da Lei de saúde sexual e reprodutiva e da interrupción voluntaria do embarazo.
Díaz considera "de todo punto inadmisible" o concurso presentado pola Consellería de Sanidade en agosto para externalizar o servizo amparándose no "dereito a exercer a obxección de conciencia".
A deputada alerta da "contradición total" desta decisión coa intervención do propio conselleira, que en xaneiro deste ano respondía a unha interpelación do Grupo Socialista dicindo que "a obxección non é problema". Na mesma intervención, aseguraba que Galicia "conta xa cos medios no sete áreas sanitarias", sempre "dentro do sistema público".
Noa Díaz alertou de que, agora, a Xunta "quere contratar a interrupción voluntaria de embarazos de menos de 14 semanas de xestación cun custo de 500.000 euros durante os próximos 3 anos, prorrogable a 5" e advertiu que isto contradí a lei 2/2010, "que foi modificada a comezos deste ano para garantir que a rede pública sexa a de referencia e que as mulleres que decidan abortar poidan facelo no centro público máis próximo á súa casa".
