A industria forestal-madeira podería bater a súa marca de facturación en 2022, chegando aos 2.700 millóns de euros

O director da Axencia Galega da Industria Forestal, Jacobo Aboal, destacou que as estimacións da Xunta para o ano 2022 indican que a facturación do sector forestal-madeira podería conseguir a súa propia marca, chegando aos 2.700 millóns de euros. Así o sinalou este venres en resposta a unha pregunta formulada durante a Comisión 7ª do Parlamento.

Na súa intervención, da que informou a Consellería do Medio Rural nun comunicado, Aboal fixo referencia á facturación conxunta dos subsectores principais da cadea de valor forestal madeira, que ascendeu aos 2.578 millóns no ano 2021. Isto supón un aumento dun 29 % con respecto á estimada en 2020 e o máximo histórico da serie desde 2006.

Ademais, segundo indicou o director, as estimacións para o ano 2022 indican que a facturación podería conseguir a súa propia marca, chegando aos 2.700 millóns de euros. Seguindo nesta liña, enxalzou a aposta da Xunta neste ámbito e destacou que no último ano a Axencia convocou axudas por un importe total de preto de 24,3 millóns de euros.

Jacobo Aboal referiuse ao cambio climático e á descarbonización como unha das máximas da Axencia, materializadas a través do fomento de construcións que incorporen madeira galega. Neste sentido, sinalou o Acordo de Colaboración co Servizo Galego de Saúde para a execución de Puntos de Atención Continuada (PAC) que se están construíndo en madeira e a colaboración coa Dirección Xeral de Defensa do Monte na construción de novas bases de unidade operativa feitas integramente con madeira de Galicia.

OFERTA FORMATIVA DE MEDIO RURAL

Pola súa banda, en resposta a outra pregunta, o director da Axencia Galega da Calidade Alimentaria, José Luís Cabarcos, debullou os principais datos sobre a evolución da oferta formativa dos centros de formación e experimentación agraria da Consellería do Medio Rural. Así, indicou que esa oferta se incrementa ano a ano e, no que se refire a a formación regulada, supón un total de 328 prazas no presente curso académico 2023-2024, o que representa unha subida de preto do 9 % en relación co curso anterior e de ata un 17,4 % respecto ao curso 2021-2022.

A maiores, o director sinalou que o persoal formado nos diferentes centros dependentes da Axencia ten un alto grao de cualificación, que o fai especialmente atractivo para a súa inserción no mercado laboral. En relación co ensino en liña, Cabarcos valorou que a actualización das formacións capacitantes e habilitantes permite unha formación de alta calidade, intuitiva e atractiva.

POLÍGONO AGROFORESTAL DE CURTIS

Na comisión, a directora xeral da Axencia Galega de Desenvolvemento Rural, Inés Santé, deu resposta a outra pregunta sobre as previsións para os proxectos de pequenas e medianas explotacións gandeiras no polígono agroforestal de Curtis, na provincia da Coruña. Respecto diso, lembrou que esta figura, enmarcada na Lei de recuperación da terra agraria, ten como obxectivo (entre outras cuestións) aumentar a base territorial das explotacións existentes nas zonas, así como articular base territorial para novos proxectos agrícolas, gandeiros ou forestais.

Ademais, apuntou que os polígonos agroforestais precisan da autorización dun 70 % das persoas titulares das terras incluídas no seu perímetro. De non alcanzarse esa porcentaxe, resolverase o arquivo do procedemento. Esta medida ten como obxectivo garantir a participación e representación dos propietarios ao longo do proceso.

APOIO DA XUNTA AO VACÚN DE CARNE

En resposta a outra pregunta, o director xeral de Gandaría, Agricultura e Industrias Agroalimentarias, José Balseiros, puxo en valor que o sector galego da carne de vacún (principalmente en extensivo) está a experimentar este ano unha inxección directa de 104 millóns de euros.

Neste mesmo sentido, o director xeral trasladou tamén que os 12 millóns de euros comprometidos a maiores polo Goberno galego para implantar unha liña de axudas directas ligadas á produción de carne de calidade serán tamén unha realidade, como os demais compromisos adquiridos polo Executivo con este sector.

Ademais, o director xeral de Defensa do Monte, Manuel Rodríguez, destacou que a Xunta incrementou en preto do 40 % os fondos destinados a cada un dos concellos asinantes do convenio coas entidades locais para prevención e defensa fronte o lume.

Tamén informou doutras medidas que inciden na mellora das condicións para os concellos asinantes, entre as que se referiu ás novas actuacións subvencionables e ao aumento de prezos unitarios nos traballos preventivos das brigadas municipais. Ademais, a simplificación dos trámites, o reforzo da formación e a ampliación das titulacións admitidas para o posto de xefe de brigada, para facilitar a contratación deste persoal.