A XXVIII edición do Ourense Film Festival arrincará este venres

O Centro Cultural Marcos Valcárcel albergou este luns a presentación dunha nova edición do Ourense Film Festival, un evento que cumpre este ano a súa XXVIII edición cun programa "amplo e plural", en palabras do seu director, Miguel Anxo Fernández, con máis dun centenar de actividades.

O certame cinematográfico ourensán celebra desde este venres, 29 de setembro, ata o próximo 8 de outubro a súa vixésimo oitava edición co obxectivo de consolidar as cifras de público logradas na pasada edición, con máis de 9.000 persoas nas diferentes actividades.

O secretario xeral de Cultura, Anxo M. Lorenzo; o presidente da Deputación de Ourense, Luís Menor; e o director do Ourense Film Festival, Miguel Ángel Fernández, presentan a XXVIII edición do certame | Fonte: OUFF

Para iso, o director anunciou novidades entre as que resaltou o peso da sección oficial Panorama Galicia, coa que se busca "recoñecer as creacións deste país" pondo "en pé de igualdade esta sección respecto da xa consolidada competición internacional". Así pois, sete documentais e tres películas de ficción compiten nesta sección que terá o Premio Xacobeo á Mellor Película dotado con 8.000 euros, ademais dos premios Ourense Film Commision a Mellor Dirección, Mellor Guión e Mellor Interpretación, cada un con 2.000 euros.

En canto ao xurado, son dez profesionais do sector audiovisual os que compoñen as seccións do OUFF. En Panorama Galicia, estarán Ángel de la Cruz, Conchi Iglesias e Estíbaliz Veiga; na sección Oficial Internacional, Estrella Araiza, Inés Branco López, Isabel Blanco e Almudena Carracedo.

Ademais, o OUFF conta cun apartado para a competición de curtametraxes, que este ano terá 15 pezas, 10 delas de ficción e cinco documentais, que se proxectarán nunha gala que terá lugar o 6 de outubro. Optarán a un galardón de 2.500 euros e a un premio do público. O seu xurado componse por Ledicia Bellón, Mamen Casal e Adriana Páramo.

RECOÑECEMENTOS A SETE FIGURAS

A maiores, o festival recoñecerá a traxectoria de sete figuras vinculadas á gran pantalla: Ana Mariscal, co Premio Memoria Histórica, que recollerá ao seu fillo David García; e Manuel Gutiérrez Aragón, Premio OUFF Especial 2023.

Xunto a estas, estarán as Calpurnias de Honra, o máximo galardón do festival. Recaerá, a nivel internacional, no director mexicano Arturo Ripstein, que estará presente na gala inaugural o 29 de setembro; e, a nivel nacional, na actriz española Loles León. No apartado galego, as homenaxeadas serán Mariana Carballal, Luisa Merelas e Olga Osorio.

Ademais, na sección oficial internacional a Calpurnia a Mellor Película está dotada con 12.000 euros e haberá outros cinco premios: OUFF Carlos Velo a Mellor Dirección con 4.000 euros, Especial do Xurado, Mellor Guión, Mellor Interpretación e Premio do Público, todos estes últimos con 3.000 euros.

O Teatro Principal, as salas de cinema Ponte Vella, o cineclube Padre Feijóo e o Auditorio Municipal son os recintos principais nos que se reproducirán as películas durante os dez días que dura o certame. A programación ao completo, así como os horarios, estará dispoñible a través da páxina web do festival www.ouff.org.

VIDEOXOGOS COMO NOVA NARRATIVA AUDIOVISUAL

"Mostrar o potencial da industria do videoxogo e a súa relación co sector audiovisual" motivou á organización a estrear este 2023 unha sección nova: a OUFF Game Session. Será unha cita na que haberá un foro sobre os "videoxogos como nova narrativa audiovisual" e catro galardóns dirixidos a estudos e profesionais de Galicia. A xornada de videoxogos terá lugar o domingo 1 de outubro no Centro Cultural Marcos Valcárcel.

"OURENSE, CAPITAL GALEGA DO CINEMA"

O presidente da Deputación de Ourense, Luís Menor, asegurou neste acto que se trata dunha cita "ineludible e consolidada", posto que serán "uns días de intensa actividade cinematográfica e turística". Entre o 29 de setembro e o 8 de outubro, máis dun centenar de proxeccións e actividades "co obxectivo de concentrar aos amantes do cinema e á cidadanía en xeral" presentaranse nun "festival de referencia", ao que chegaron máis de 300 propostas de 60 países na preselección.

Así pois, un ano máis haberá visitas guiadas por varias vilas con saída desde Ourense para ensinar distintas localizacións que diferentes directores converteron en escenarios das súas producións, tanto espazos naturais como urbanos. Esta edición terá tres rutas. A primeira, o luns 2 de outubro, comezará na Deputación Provincial para coñecer a zona vella de Ourense, desprazarase ata Pazos de Arenteiro e terminará en Moldes (ambas as localidades no municipio de Boborás), antes de regresar en autobús a Ourense.

O día 4 o protagonismo terano Esgos, Allariz e Celanova, con saída e chegada a Ourense, do mesmo xeito que o venres 6 de outubro cando as citas serán en San Clodio, Ribadavia e Melón. "É o momento de lembrar a aposta que se fixo na Deputación e ao equipo que recolleu as rendas deste festival e salvouno da súa desaparición", celebrou Menor, subliñando que "cada edición supera á anterior" e "marca retos máis ambiciosos", antes de enxalzar que "Ourense será estes días a capital galega do cinema".