Formoso sobre as primarias: "O PSdeG está en plena festa democrática e o candidato favorito é o pobo galego"

O secretario xeral do PSdeG, Valentín González Formoso, remarcou que están en "plena festa democrática" do seu partido e da súa destinataria final que é a sociedade galega. Así, a tan só uns días de pechar o prazo para a presentación e recollida de avais das primarias do PSdeG, Formoso sinalou, a preguntas dos medios, que o candidato favorito "é o pobo galego".

Así o fixo, a preguntas dos medios, durante a súa visita á granxa da Cernada coincidindo co Día Internacional das Mulleres Rurais. "Creo que hai moitos deberes por diante que se deben facer nunha Galicia que entende que hai sitios peores, pero tamén mellores e que entende que necesita unha inxección de moral en todos os sectores estratéxicos dun país que nunca está na punta de lanza e que tampouco está na cola", esgrimiu.

A continuación, remarcou que a comunidade "pode aspirar" a estar na punta de lanza xa que "ten vimbias para iso". Por tanto, unha Galicia que "necesita reter talento" en todos os seus ámbitos. "Que necesita apostar pola ciencia, polo rural e, por tanto, creo que as primarias do PSOE buscan escoller á mellor persoa que se identifique con este obxectivo", sentenciou.

PLAN DE REEQUILIBRIO ECONÓMICO AO RURAL

Noutra orde de cousas, Formoso propuxo un plan de reequilibro económico para o rural galego que garanta a igualdade de oportunidades para as mulleres. "Para iso necesitamos aterrar estas prioridades en cada un dos concellos de interior do rural de Galicia e que o transporte volva existir no rural", sinalou. Alí, detallou que no rural hai 300.000 familias que aínda non teñen conectividade por Internet un feito que "lastra absolutamente a súa competitividade".

"Un rural galego que perde preto de 108.000 persoas desde os últimos 16 anos", por tanto, continuou Formoso, un rural que "necesita que se interiorice", que Galicia remarque o traballo que se fai nun mundo rural onde o 24 % dos traballadores autónomos son mulleres que son "un alicerce básico" para alcanzar a "soberanía alimentaria" ante a carestía dos prezos dos alimentos.

Desta forma, incidiu en que apostar polo rural é unha "solución absolutamente intelixente" polo que esixen ao Executivo autonómico un plan de reequilibrio económico. "Se loitamos contra o reto demográfico e queremos que a xente nova quede no rural, ten que ter uns servizos mínimos en comunicación, en saúde pública, en transportes e, loxicamente, en educación e emprego", puntualizou.

O secretario xeral do PSdeG, Valentín González Formoso | Fonte: PSDEG