As ofertas de emprego caen en Galicia un 25 % en decembro, onde 3 de 10 dez vacantes están ligadas á actividade comercial
As ofertas de emprego caeron en Galicia case un 25 % en decembro, case o dobre que os datos a nivel estatal, que alcanzaron as 153.614 vacantes, o que supón un 12 % menos respecto ao mesmo mes do ano anterior e un 29 % menos fronte a novembro, segundo datos de Infojobs.
Por Europa Press / Redacción | SANTIAGO | 04/01/2024 | Actualizada ás 12:41
As ofertas de emprego caeron en Galicia case un 25 % en decembro, case o dobre que os datos a nivel estatal, que alcanzaron as 153.614 vacantes, o que supón un 12 % menos respecto ao mesmo mes do ano anterior e un 29 % menos fronte a novembro, segundo datos de Infojobs. Desde InfoJobs sinalaron que a caída de ofertas de traballo respecto ao mes anterior era "previsible" tras os bos resultados que se rexistraron ao iniciarse a campaña de Nadal e o adianto das contratacións.
Por sectores, compras, loxística e almacén (13 % do total); atención ao cliente (12 %); e venda ao detalle (3 %) reúnen o 28 % do total de vacantes ofertadas, é dicir, tres de cada dez vacantes corresponden a unha destas categorías, ligadas á actividade comercial. Desta maneira, compras, loxística e almacén rexistran preto de 20.000 postos de traballo ofertados; atención ao cliente recolle case 18.000 vacantes e venda ao detalle reporta case 5.300 postos ofertados.
EDUCACIÓN E CALIDADE, PRODUCIÓN E I+D, AS DE MÁIS VACANTES
O crecemento en vacantes de emprego máis positivo este decembro rexístrao calidade, produción e I+D, que supera as 7.900 vacantes, un 65 % máis que no mesmo mes do ano anterior. A esta categoría séguelle educación e formación, a cal rexistra máis de 6.100 postos de traballo e sobe un 36 %.
Non entanto, en comparación con decembro do ano pasado, a maior parte das categorías rexistran porcentaxes negativas. Así, comercial e vendas rexistrou un 31 % menos de vacantes que en decembro de 2022, ata as 22.110 vacantes, mentres que informática e telecomunicacións, un 38 % menos (6.790). Con todo, no mes de decembro, as tres primeiras posicións do ranking dos postos máis demandados ocúpanas teleoperador, con 14.800 postos de traballo ofertados; mozo de almacén, con case 9.900; e condutor de vehículo de reparto, con 7.800.
UN 43,2 % DO TOTAL DE VACANTES SON DE CARÁCTER INDEFINIDO
Entre as vacantes rexistradas en InfoJobs publicáronse un total de 66.441 postos cun tipo de contrato indefinido, o que representa o 43,2 % das vacantes que informaban sobre a tipoloxía de contrato. No referente aos contratos de duración determinada, esta tipoloxía reuniu durante o mes de decembro o 28,3 % do total de vacantes ofertadas, 43.510. En canto ao tipo de xornada a realizar, en decembro, predominaron as vacantes que ofrecían xornada a tempo completo, que representaron o 62,4 % do total, mentres que o 19 % dos postos de traballo ofrecían xornada parcial.
SÓ CATRO COMUNIDADES REXISTRAN MÁIS OFERTAS FRONTE A 2022
Por comunidades autónomas, só Castela a Mancha (+ 17,88 %), Estremadura (+ 11,71 %) , Madrid (+ 0,35 %) e Murcia (+ 0,24 %) rexistraron máis ofertas de emprego en comparación a decembro de 2022. No lado oposto, as maiores perdas de ofertas de postos de traballos déronse en Asturias (- 35,44 %), Comunidade Valenciana (- 30,46 %) e Galicia (- 24,83 %). En cifras absolutas, Madrid foi a comunidade autónomas que máis vacantes de emprego rexistrou en decembro, con 47.590. Séguenlle Cataluña (30.671) e Andalucía (15.985).
