O alumnado de cuarto de Primaria e segundo de Secundaria realizará unha proba para avaliar o nivel de estudos
Por E.P. | SANTIAGO DE COMPOSTELA | 12/01/2024 | Actualizada ás 12:55
O Diario Oficial de Galicia (DOG) publicou este venres a orde que regula o desenvolvemento da avaliación de diagnóstico en Galicia que entrará en vigor en 20 días e ten como obxectivo mellorar o nivel de formación dos estudantes, precisa a Consellería de Educación no contido da mesma.
A proba realizarase en todos os centros educativos galegos que impartan ensinos correspondentes a cuarto curso de Educación primaria e/ou segundo curso de Educación Secundaria Obrigatoria e vesarán sobre as competencias específicas ás que se refire o marco teórico común de avaliación.
A súa finalidade, explica, é contribuír a determinar o nivel adquirido polo alumnado nas competencias das distintas materias de cara a promover que os centros elaboren propostas de actuación que contribúan a mellorar o nivel alcanzado polos estudantes, adopten medidas de mellora da calidade e a equidade da educación e orienten a práctica docente.
En consecuencia, concreta, terá carácter "informativo, formativo e orientador para os centros, para o profesorado, para o alumnado e as súas familias ou persoas titoras legais, e para o conxunto da comunidade educativa". Así mesmo, "carecerá de efectos académicos".
O órgano superior ou de dirección competente en materia de avaliación do sistema educativo determinará en cada curso escolar cales serán as áreas e materias obxecto de avaliación e as datas en que se realizarán as probas.
