Primeras peticións aos novos conselleiros: mellor sanidade pública, prezos xustos no rural ou máis defensa do galego

Sanidade, políticas sociais, lingua ou empresas e comercio están xa entre as primeiras reclamacións ao novo executivo galego. Así, distintos colectivos e entidades pediron xa xuntanzas cos novos conselleiros para abordar algunha destas situacións.

É o caso da Asociación de Pacientes e Usuarios do CHUS que agarda entrevistarse en breve co novo conselleiro de Sanidade, Antonio Gómez Caamaño, que ademais é un especialista en oncoloxía tras dirixir esta área no Hospital de Santiago.  Esta entidade lembra que non é a primeira vez que se producen atrasos nas consultas de oncoloxía do CHUS, polo que, "ou ben se están a producir procesos de estabilización de prazas cada poucos meses dende 2022, ou neste servizo faltan recursos".

 

Ademais, lembran os atrasos e o aumento das listas de agarda para atender aos pacientes, que tras a quimioterapia e a radioterapia seguen con tratamento farmacolóxico, que debe ser supervisado polo oncólogo, "cousa que non está a suceder". "Por certo, debemos engadir que en múltiples ocasións non somos atendidos polo oncólogo fixado como responsable do seguimento da doenza e como persoal sanitario que debe garantir a subministración da información, o que é unha vulneración do establecido na Lei de Saúde de Galicia e na Lei básica reguladora da autonomía do paciente", lembra a entidade.

 

AGRICULTURA

 

Por outra banda, o sector agrario galego demanda á nova conselleira do Medio Rural, María José Gómez (Guntín, 1976), medidas para conseguir "prezos xustos", eliminar burocracia e mellorar servizos públicos, entre outras cuestións. En declaracións a Europa Press, o secretario de Coordinación Sectorial de Unións Agrarias (UU.AA.), Félix Porto, desexou "acertos" a Gómez no seu novo cargo, posto que iso "vai ser bo para os sectores produtivos". Chama a que haxa "solucións" a "curto prazo" para os problemas do campo e espera que "o perfil de alcaldesa coñecedora do medio rural poida darlle un aliciente" á conselleira "para traballar neste sentido".

De tal forma, apunta a "grandes problemas" no rural galego, entre os que cita "o progresivo envellecemento", para o que se require actuacións coas que os mozos queden nas explotacións; á vez que se dea "viabilidade económica" ás explotacións, con prezos "xustos" no lácteo que eliminen as diferenzas con outras comunidades e un protocolo para a carne co que se cubra custos.

 

PLAN DE NORMALIZACIÓN

 

Tamén a Mesa pola Normalización Lingüística pídelle á Xunta que demostre con feitos e non con aparencias o seu compromiso co futuro do galego. "É imprescindíbel que os poderes públicos se poñan á fronte da situación de emerxencia linguística e garantan e o dereito ao uso do galego e a súa presenza e disponibilidade en todos os ámbitos", reclama o presidente da entidade, Marcos Maceira.

A asociación do galego indica que respecto do galego existen acordos que deben ser cumpridos e executados, lembrando que o Plan Xeral de Normalización Lingüística de Galiza está absolutamente paralizado, cando se van facer 20 anos da súa aprobación por unanimidade parlamentar. Este Plan conta con obxectivos claros e 400 medidas concretas que é preciso reactivar, avaliar e revisar nalgún caso, mais é tamén unha necesidade para favorecer o uso do galego e comezar a reverter o estado de emerxencia no que se encontra o idioma de Galiza.

EMPRESAS

A Confederación de Empresarios de Galicia (CEG) empraza ao novo conselleiro de Emprego, Comercio e Emigración, José González, a afrontar retos pendentes como o demográfico, dado o envellecemento da poboación, así como a cubrir as vacantes que demandan as empresas. Igualmente, pide reverter "a saída de mozas ao exterior sen retorno".

Segundo explica a patronal galega a Europa Press, "Galicia sofre unha perda continuada da súa poboación". "O noso tecido empresarial enfróntase a unha escaseza de man de obra en determinados postos e sectores e unha alta porcentaxe destes postos non se cobren por falta de profesionais", afirma. Por iso, cre necesario "fortalecer os grupos profesionais con cualificacións intermedias e insistir na aprendizaxe ao longo de toda a vida: os traballadores deben adaptarse ás novas necesidades". Unha cuestión na que se considera "clave" a formación.

Ademais, a CEG observa que o diálogo social e a negociación colectiva "deben ser e son a pedra angular dun marco laboral estable e flexible". "A política de emigración e especialmente a atención aos galegos no exterior e a oportunidade de que os emigrantes e as súas familias volvan a Galicia e atopen aquí oportunidades é tamén un asunto capital", agrega.

COMERCIO

A Confederación de Empresarios, que valora o paso de José González pola Consellería de Medio Rural, onde "mostrou a súa capacidade para abordar os desafíos do medio rural e o seu compromiso co desenvolvemento económico e rexional", tamén lle pon deberes no tocante ás súas novas responsabilidades de comercio, que sofre "unha crise tras outra". Asegura que "é preciso manter e impulsar medidas que palíen a crise de consumo", con axudas específicas para os autónomos comerciantes e campañas de promoción.