A Deputación de Ourense aproba por unanimidade urxir medidas para reconducir a situación da Mina de Penouta

A sesión do pleno ordinario do mes de xuño da Deputación de Ourense serviu para que todos os grupos políticos aproben por unanimidade unha moción socialista na que solicitan adoptar medidas para a reconducción da situación da Mina de Penouta, en Viana do Bolo, tras a sentenza do Tribunal Superior de Xusticia de Galicia que paraliza a súa actividade.

Todos os grupos políticos (Democracia Ourensana, Partido Popular, Partido Socialista e Bloque Nacionalista Galego) estiveron de acordo en demandar que a Deputación facilite asesoramento e atención aos traballadores "para paliar a difícil situación que atravesan"; tamén en esixir "a aceleración e a realización" dos estudos sobre a realidade das condicións hídricas da contorna da explotación.

Na moción lembraban que, en base ao principio de precaución, o Tribunal entende que "non convén permitir a actividade ata que non se realicen os estudos que avalíen os niveis de metais". Para o deputado socialista encargado de defender a moción, Aurentino Alonso, "Augas de Galicia, que depende da Xunta, está a tardar demasiado en dar conta dos resultados desas analíticas".

Neste sentido, pediu que se tomen decisións "oportunas" para que a mina volva funcionar, cumprindo os requisitos ambientais e que "non se vexan afectados os postos de traballo" que, destacou, "tanto necesita a Galicia baleirada". A mina de Penouta ten gran importancia na economía da comarca de Viana do Bolo, posto que dela dependen directamente un total de 129 familias, así como empresas auxiliares e de servizos, polo que os sindicatos "estiman que se crean ata tres postos indirectos por cada traballador da explotación", segundo lembraron hoxe na corporación provincial.

Por todo iso, acordaron contemplar a elaboración dun estudo en profundidade sobre a realidade e potencialidades do sector mineiro na provincia, "que inclúa o estado das concesións e dereitos mineiros con vistas á actualización e reordenación do sector". "O Goberno autonómico ten que darlle unha volta ás concesións e, nalgúns casos, volver sacalas a concurso, porque non é admisible que a Mina de Penouta permaneza pechada tratándose dunha explotación única en Europa", apuntou Alonso, lembrando que é a única de todo o continente "onde se extrae coltán, un mineral estratéxico a nivel mundial". "Fronte á falta de reactividade da Xunta de Galicia, a Deputación está obrigada a ser parte da solución", remacharon os socialistas.

Maquinaria pesada na mina de Penouta, a 2 de decembro de 2023, en Viana do Bolo, Ourense | Fonte: Rosa Veiga - Arquivo