A Xunta fará un estudo sobre o impacto do recorte da xornada laboral en Galicia
O Goberno galego realiza unha invitación formal á CIG para participar nas reunións de diálogo social.
Por Europa Press / Redacción | SANTIAGO DE COMPOSTELA | 11/07/2024 | Actualizada ás 18:07
O conselleiro de Emprego, José González, informou de que a Xunta vai facer un estudo que avalíe os impactos que tería o recorte da xornada laboral no tecido laboral de Galicia. Segundo explica o Goberno autonómico, este estudo faise "co obxectivo de examinar as consecuencias na produtividade e tratar de protexer a empresas e traballadores galegos".
Por outra banda, o conselleiro anunciou que enviou unha invitación formal ao sindicato nacionalista CIG para participar das reunións de diálogo social. No seu día, o secretario xeral da CIG, Paulo Carril, chegou a denunciar o "apartheid" que sofre "a primeira central sindical" en Galicia por parte da Xunta por só querer reunirse con sindicatos que "lle fan a onda". Con todo, a comezos de maio deste ano, o novo conselleiro de Emprego xa mantivo un encontro con Carril no marco da "primeira toma" de contacto que realizaba cos sindicatos.
O conselleiro realizou estes anuncios durante a súa participación na inauguración da cuarta edición do evento O Encontro da Toxa 2024, que organiza Cesuga en colaboración coa Xunta. Participan máis de 70 relatores e 400 asistentes. Entre outros, interviñeron o presidente do consello reitor de Cesuga, Venancio Salcines, e a responsable do servizo de estudos, políticas públicas e relacións institucionais do Banco Santander, Bárbara Navarro. Así mesmo, González destacou o papel da transformación dixital e a intelixencia artificial para o impulso dun mercado laboral galego máis dinámico e inclusivo.
