Unións Agrarias acusa a Capsa de buscar "amedrentar" a representantes sindicais

Unións Agrarias (UU.AA.) acusa á Corporación Alimentaria Peñasanta (Capsa Food) de buscar "amedrentar" a representantes sindicais por vía xudicial. Nun comunicado, Unións Agrarias indica que membros da organización compareceron esta mañá de xoves nos xulgados asturianos de Pola de Siero para prestar declaración en relación á demanda impulsada pola láctea. "Unha actuación que supón un atentado contra a liberdade sindical e os dereitos dun sector que leva anos padecendo os comportamentos abusivos das industrias lácteas", critica.

A organización agraria condena "o basto intento de Capsa de calar a quen sinala os abusos das industrias e traballa activamente a favor dos dereitos do sector produtor". "Membros da organización compareceron esta mañá en sede xudicial para ratificar a veracidade de todas as declaracións realizadas nos últimos meses en relación ao comportamento dunha industria que, debido ao seu volume de recollida e ao número de explotacións coas que traballa, marca tendencia no que a evolución dos prezos en orixe en Galicia refírese", explica.

Noutra orde de cousas, a Federación Rural Galega (Fruga) denunciou, este mesmo xoves, que cadeas de supermercados iniciaron campañas promocionais de venda de leite con baixos prezos. Nun comunicado, lembra que o prezo en orixe debe respectar a lei da cadea alimentaria e "ser o custo efectivo de produción calculado tendo en conta os custos de produción".

Protesta de Unións Agrarias nun supermercado de Santiago | Fonte: UNIÓNS AGRARIAS