Produtores de Tenreira Galega comezan unha folga de entrega a matadoiros de tenreiros polos baixos prezos
Os gandeiros, encabezados por Santiago Rego, esixen prezos xustos que reflictan o aumento dos insumos como electricidade e fertilizantes.
Por Europa Press / Redacción | SANTIAGO DE COMPOSTELA | 30/07/2024 | Actualizada ás 16:42
Produtores agrupados na Asociación Gandeiros Galegos da Suprema comezaron este martes unha folga de entregas a matadoiros de tenreiros e vacas polos baixos prezos que se pagan en orixe. En declaracións a Europa Press, o presidente da asociación, Santiago Rego, explica que os produtores de Tenreira Galega Suprema están a cobrar entre 5,80 e 5,90 euros por quilo, uns 50 céntimos menos que os 6,30 euros que percibían hai un ano, a pesar de que os prezos "mesmo soben" para o consumidor.
Por iso, decidiron comezar unha folga de entrega de reses, principalmente tenreiros, que durará ata o 7 de setembro. Con iso buscan chamar á "reflexión" a toda a cadea de valor e administracións sobre a súa problemática. Precisamente, esta é a época de maior demanda de animais, aínda que explica que "escasean". "Non entendemos por que non acaban de arrincar os prezos en orixe", lamenta, posto que se paga "igual que hai 30 anos", a pesar de que os insumos como electricidade e fertilizantes "se cuatriplicaron".
Segundo explica Rego, a Asociación Gandeiros Galegos da Suprema conta cuns 500 asociados dos 8.000 que está baixo este selo, a maioría deles na provincia de Lugo, aínda que representan entre o 40%-50% dos animais baixo este selo.
