Crear máis variedades de sementes de millo para solucionar a súa carencia na alimentación humana e animal en Galicia

Varias empresas, asociacións e centros de investigación lanzaron un proxecto co que buscan producir máis variedades de sementes de millo destinadas tanto á alimentación humana como animal. O proxecto, que ten como título 'Millo para alimentación humana e animal', foi presentado este xoves nunha rolda de prensa na sede de Unións Agrarias en Santiago.

"Imos abordar un tema moi importante, porque unha das grandes carencias que ten o sector agrario e gandeiro de Galicia é a produción de forraxe e de alimentos, tanto para o consumo animal como para o consumo humano", detallou o representante da Asociación de Desenvolvemento Rural Ódega, Jacobo Feijoo. Neste sentido, cifrou que o déficit desta especie de planta gramínea sitúase nos tres millóns de toneladas que, anualmente, teñen que ser importadas.

Para resolver esa "dependencia" e poder producir en Galicia os alimentos teñen dúas vías: aumentar a base territorial, pondo máis superficie de cultivo, e aumentar os rendementos das variedades que hai actualmente. Desta forma, o proxecto o que busca é, segundo puntualizaron, colaborar en "producir máis con menos". "Producir máis alimentos coa superficie que temos e con menos necesidades de insumos", detallou Jacobo Feijoo.

Pola súa banda, a xefa do grupo Xenética e Mellora de Millo da Misión Biolóxica de Galicia (MBG CSIC), Rosa Ana Malvar, sinalou que en Galicia hai un problema e é que "se pode producir máis pero non o fan". Ademais, continuou Malvar, o outro inconveniente é que a semente que se obtén "non está perfectamente adaptada" ás condicións de Galicia. Por iso, mediante variedades tradicionais e outras desenvolvidas polos expertos participantes neste proxecto, tentarán que os seus tipos poidan chegar ao sector.

Na rolda de prensa tamén participaron o director técnico de Sementares S.L, Fernando Almeida, o investigador do CSIC Pedro Revilla e a investigadora do Centro de Investigacións Agrarias de Mabegondo (CIAM), Laura Campo.