Aqualia, as avarías e a interlocución cos clientes

Domingo, 15 de decembro de 2024, 19:30 h. Abro a billa do lavabo do cuarto de baño. Non sae nin pinga de auga! Que está a pasar aquí? 

Telefono ao Servizo de Atención ao Cliente da compañía coa que teño contratado a subministración: Aqualia. Segundo o operador, non lles consta ningunha avaría na zona. 

Penso. Consultarei a un veciño. «Eu tampouco teño auga. Non é extraordinario que a corten neste barrio debido a algún incidente. A última vez ocorreu fará cinco ou seis meses». Ignora, e non se preocupou por pescudalo, que puido acontecer. 

Ninguén sabe nada. Estamos en Galicia. Os cidadáns non inquiren, non se interesan, non esixen os seus dereitos, aínda que paguen por eles. A súa idiosincrasia autística non llo permite: prefiren enrocarse no «isto é meu/isto non vai comigo». 

Saio da casa. Talvez cando volva estea solucionado o problema.

Nunha rúa adxacente vexo un gran buraco circundado cunha cinta de sinalización desta empresa, que xestiona do Servizo Municipal de Augas en máis de mil concellos de España e doutros dezaoito países.

Volvo chamar á compañía para advertirlles do meu achado. Á telefonista, agora si lle figura unha fuga na rúa X, onde se sitúa a fochanga. «Es que se tarda un cierto tiempo en que nos entren en el sistema esta clase de problemas».

Que ocorreu en realidade? Ao finalizar a conversación telefónica, o primeiro operador púxose en contacto co servizo de avarías, onde lle comunicaron que, en efecto, produciuse unha nese lugar. O mundo ao revés: quen, de oficio, deberían de informar dos contratempos non o fan se non llo preguntan.

Poderían ter o detalle de avisar aos usuarios de que se ía a interromper a subministración, suxírolle á miña interlocutora. «Eso no lo hacemos nunca», contéstame con desgana.

Cara ás 21:05 h retorna o abastecemento do tan prezado líquido incoloro, inodoro e insípido, indispensábel para cociñar, asearse ou hidratarse; é dicir, para vivir.

Como parte interesada en preservar a miña saúde e o meu ser, e os dos meus conveciños, requírolle a esta gran empresa multinacional o seguinte:

1.- Que os traballadores a pé de rúa, cando se produza unha avaría que esixa a interrupción da subministración póñanse en contacto inmediatamente co Servizo de Atención ao Cliente, de maneira que este poida achegar información veraz a aqueles que lla demanden.

2.- Aqualia ten que implementar, no maior breve prazo posíbel, un sistema de alertas a través do cal remita un SMS aos abonados afectados no que nos comunique de modo instantáneo a existencia das avarías, a súa localización, a súa entidade e o tempo previsto para que se resolva. E, cando isto aconteza, por medio doutra mensaxe aos seus teléfonos móbiles indicarlles que o servizo foi restablecido.

Non se necesita ningunha intelixencia, nin natural, nin artificial. O único que se precisa é ter empatía, e respecto por quen asegura o seu lucro económico pagando relixiosamente as súas cotas, importes fixos abusivos e canons e impostos complementarios de propina incluídos.