O prezo dos coches de segunda man en Galicia sobe un 2,5 % en xaneiro, ata os 12.306 euros

O prezo dos coches de segunda man en Galicia subiu un 2,5 % o pasado mes de xaneiro, en comparación co mesmo mes de 2024, ata 12.306 euros, segundo datos publicados este luns pola Asociación Nacional de Comerciantes de Vehículos (Ancove). Así, Galicia sitúase como a sexta comunidade española con menor custo destes modelos usados, por detrás de Canarias (11.200 euros), de Asturias (11.999 euros), de Navarra (12.192 euros), de Castela e León (12.204 euros) e de Murcia (12.301 euros).

En Galicia comercializáronse en xaneiro 9.433 coches de ocasión, dos cales 6.309 tiña máis de oito anos. O prezo medio destes vehículos máis antigos subiu un 2,2 %, ata 9.483 euros. A nivel nacional, o custo dos coches de segunda man situouse nunha media de 12.750 euros, un 0,4 % menos que en xaneiro de 2024. Ancove indica que o descenso no prezo do total dos turismos do 0,4 % anual susténtase na caída de tres comunidades autónomas: Madrid (-3,4 %; 14.277 euros), Castela-A Mancha (-2,1 %; 13.111 euros) e Aragón (-0,4 %; 12.640 euros) e a moderación nas subidas doutras dúas: Cataluña (+0,2 %; 12.610 euros) e Andalucía (+0,9 %; 12.587 euros).

A asociación destaca tamén que o maior encarecemento en termos interanuais produciuse en xaneiro nas comunidades de Cantabria (+4,9 %; 12.363 euros) e Estremadura (+3,6 %; 12.451 euros). Por último, Ancove explica que os turismos de máis idade tamén están a moderar os seus prezos, fronte aos incrementos de meses anteriores. En xaneiro só soben unha décima, con baixadas en Cataluña (-0,6 %; 9.705 euros), Madrid (-2,6 %; 11.184 euros) e A Rioxa (-1 %; 9.974 euros). En Cantabria (10.340 euros), este segmento do mercado sobe de prezo un 4,1 % en termos internanuais e en Castela e León o 2,6 % (9.849 euros). De media, a nivel nacional o incremento dos coches de máis de oito anos foi de 0,1 %, ata 9.840 euros.

Coches usados ou de segunda man | Fonte: GANVAM - Arquivo